Nur-Sultan qalasynyń mamandandyrylǵan aýdanaralyq tergeý soty burynǵy densaýlyq saqtaý ministri Eljan Birtanovty úiqamaqta ustaý merzimin uzartý týraly tergeý organynyń ótinishin qarady, dep habarlaidy "Ult aqparat".
Sot otyrysyna qorǵaýshy tarap retinde advokattar Serik Saǵaliev, Dmitrii Kýriachenko, Nurlan Beisekeev jáne aiyptalýshy Eljan Birtanovtyń ózi qatysty.
Eljan Birtanovty úiqamaqta ustaý merzimin uzartý týraly ótinishti Bas prokýratýra ókili Tólegen Jaraspaev jetkizdi. Prokýratýra ókili óz sózinde úiqamaqta ustaý merzimin taǵy bir aiǵa – 2021 jyldyń 14 maýsymyna deiin uzartýdy, Birtanovqa meditsinalyq mekemelerden basqa nysandarǵa úiden shyǵýǵa ruqsat bermeýdi surady.
Eks-ministrdiń úiqamaq merzimi 14 mamyr kúni aiaqtalýy kerek bolǵan. Qorǵaýshy taraptan sóz alǵan advokattardyń iske qatysty derekteriniń moldyǵyn eskergen sýdia Aibek Ábý sot otyrysyn erteń, 6 mamyrda jalǵastyrý týraly sheshim shyǵardy.
Burynǵy densaýlyq saqtaý ministri Eljan Birtanov byltyr maýsym aiynda qyzmetinen bosatylǵan bolatyn. Al kúzde eks-ministr biýdjet qarajatyn ysyrap etti degen kúdikpen qamaýǵa alynǵan.
Eske salsaq, ótken aida Nur-Sultan qalasynyń mamandandyrylǵan aýdanaralyq tergeý soty burynǵy ministr Eljan Birtanovty úiqamaqta ustaý merzimin uzartyp, biraq úiden shyǵýǵa ruqsat bergen edi.
Densaýlyq saqtaý ministri Aleksei Tsoi brifinginiń birinde burynǵy ministrdiń sot bergen múmkindikti paidalanyp, kommertsiialyq qurylymda jumys istep júrgenin málim etken.
