QR Bas prokýratýrasynyń saity Bas prokýrordyń orynbasary Bolat Dembaevtyń «Prokýratýra týraly» Zańnyń 31-baby tártibindegi úndeýin jariialady.
"Bas prokýratýra túsindirý jumystaryn júrgizgenine qaramastan, jekelegen adamdar, sonyń ishinde shetelden, sondai-aq tyiym salynǵan "Qazaqstannyń demokratiialyq tańdaýy" ("QDT") ekstremistik uiymynyń jaqtastary áleýmettik jelilerde el turǵyndaryn zańsyz mitingilerge qatysýǵa shaqyrýyn jalǵastyrýda", - dep jazylǵan Dembaevtyń úndeýinde.
Bas prokýrordyń orynbasary Muhtar Ábliazovtyń bilikti kúshpen qulatýǵa jáne basyp alýǵa, áleýmettik arazdyqty qozdyrýǵa jariia shaqyrýyna bailanysty "QDT" uiymy Qazaqstannyń barlyq aýmaǵynda ekstremistik dep tanylyp, qyzmetine tyiym salynǵanyn eskertti.
"QDT" ekstremistik uiymy beibit uiym bolyp tabylmaidy. Onyń qyzmetine qatysý Qazaqstan Respýblikasy Qylmystyq kodeksiniń 258 (ekstremistik áreketti qarjylandyrý jáne terrorizmge ne ekstremizmge ózge de dem berýshilik) jáne 405-baptaryna (ekstremizmdi júzege asyrýǵa bailanysty onyń qyzmetine tyiym salý týraly sottyń sheshimi bar uiymnyń qyzmetine qatysý) sáikes qylmystyq jaýapkershilikke ákep soqtyrady.
Sondai-aq, bas prokýratýra buqaralyq is-sharany ótkizýge ruqsat alǵanǵa deiin ony uiymdastyrýshynyń, ózge de tulǵalardyń buqaralyq aqparat quraldarynda, Internette nemese basqa aqparat jelilerinde onyń ótkiziletin kúni, orny men ýaqyty týraly jariialaýǵa quqyǵy joq ekenin eskertti.
"Sonymen qatar, olardyń osy maqsatta paraqshalar, plakattar jáne ózge de osyndai materialdardy daiyndaýǵa jáne taratýǵa quqyǵy joq. Atalǵan erejelerdi buzǵan uiymdastyrýshy Ákimshilik quqyq buzýshylyq týraly kodekstiń 488-babynyń 3-bóligi boiynsha jaýapqa tartylady", - dep túsindirdi Dembaev.
Basqasha aitqanda, 2020 jyldyń 22 aqpanynda zańsyz aktsiialardy uiymdastyryp, ótkizgender úshin ákimshilik yqpal etý sharalary qabyldanady. Eger bul áreketter azamattardyń, uiymdardyń, qoǵamnyń nemese memlekettiń quqyqtary men zańdy múddelerine eleýli ziian keltirse, onda kináli adamdar qylmystyq jaýapkershilikke tartylady.
"Sonymen qatar Qazaqstan Respýblikasynyń 2019 jylǵy 26 qarashadaǵy №273-VI QRZ Zańymen Ákimshilik quqyq buzýshylyq týraly kodekste 2019 jylǵy jeltoqsannan bastap kámeletke tolmaǵan adamdy zańsyz jariia aktsiialarǵa tartqany, sol siiaqty ony qoǵamdyq, toptyq nemese jeke múddeler men qarsylyq bildirýdiń nysandarynda paidalanǵany úshin jaýaptylyq engizilgenin túsindiremiz.
Osy quqyq buzýshylyq úshin Ákimshilik quqyq buzýshylyq týraly kodekstiń 128-babynyń 2-bóligi boiynsha júz ailyq eseptik kórsetkish mólsherinde aiyppul nemese on táýlikke deiingi merzimge ákimshilik qamaý kózdelgen.
Osyǵan bailanysty, kez kelgen adamnyń ruqsat etilmegen jariia is-sharalardy uiymdastyrý nemese oǵan qatysý jónindegi is-áreketteriniń jolyn quqyq qorǵaý organdary zańmen kózdelgen jaýaptylyq sharalaryn qabyldai otyryp, kesetin bolady.
Bas prokýratýra azamattardy arandatýshylyqqa ermeýge, qoldanystaǵy zańnamany múltiksiz saqtaýǵa jáne zańsyz jariia aktsiialarǵa qatysýdan bas tartýǵa shaqyrady" delingen úndeýde.
