Foto: RIA Novosti
Májilis depýtaty Ajar Saǵandyqova turǵyndarǵa kómirdiń ýaqytyly jetkizilmeýine alańdaýshylyq bildirdi, dep habarlaidy QazAqparat agenttigi.
«Biz halyqqa kómir jetkizý máselesin kótermekpiz. Qaraǵandy oblysynyń jer qoinaýyn paidalanýshy kompaniialardyń derekteri boiynsha «Razrez Kýznetskii» JShS jáne SAT Komir JShS kómir tasymaldaýǵa vagondardyń 22%-yn ǵana bólgen. Bul qazaqstandyqtardy kómirmen tolyq qamtýǵa kedergi keltiredi. Bizdiń málimetterimiz boiynsha, Qazaqstanda jyljymaly parktiń tek eki iri operatory bar: «Qaztemirtrans» AQ jáne «QTJ – Júk tasymaly» JShS. Olar «Qazaqstan temir joly» AQ-nyń enshiles kompaniialary. Al «Qaztemirtrans» AQ balansynda 40 myńǵa jýyq júk vagony bar», - dedi Ajar Saǵandyqova Premer-Ministrdiń atyna saýal joldai otyryp.
Halyq qalaýlysynyń aitýynsha, kómir jetkizý jyl saiyn problema bolyp otyr. Óńirlerdiń ákimdikteri kómirdi jetkizýdi qolmen retteýge májbúr.
«Kómirdi jetkizýdegi irkilistiń sebepteri vagondardy ýaqytyly jetkizbeý jáne halyqqa kómir jóneltý kestesininiń artta qalýymen bailanysty. Birneshe jyldan beri biz barlyq aimaqta kómir kezeginiń ósip kele jatqanyn baiqaimyz. Keide onyń arty qaqtyǵystarǵa ulasyp jatady. Alypsatarlar buny sátti paidalanady. Saldarynan qarapaiym halyq kómirsiz qalady, ásirese muqtaj jandar», - dedi ol.
Sóz sońynda depýtat Úkimet basshysy Álihan Smaiylovqa eki usynys jasady:
1. Kómirdi tasymaldaý boiynsha barlyq kásiporyn úshin teń jaǵdaidy qamtamasyz etý;
2. «Qazaqstan temir joly» ulttyq kompaniiasy» AQ qyzmetine prokýrorlyq tekserý júrgizý.
