Bas prokýratýrada Bas prokýror Ǵizat Nurdáýletovtyń tóraǵalyǵymen keńeitilgen alqa otyrysy ótip, onda 2019 jyly atqarylǵan jumystar qorytyndylandy, dep habarlaidy "Ult aqparat".
Bas Prokýror atap ótkendei, eldegi kriminogendik jaǵdai jaqsarǵan. Ótken jylmen salystyrǵanda qylmystyq quqyq buzýshylyqtar sany 17 %-ǵa azaidy. Kisi óltirý 11%-ǵa, buzaqylyq 28%-ǵa, esirtki qylmysy 12%-ǵa qysqarǵan.
«Biz kez kelgen zań buzýshylyqtarǵa der kezinde tótep berýge tiispiz. Eń timdisi, olarǵa jol bermeý», - dedi Bas prokýror.
Ol sondai-aq quqyqbuzýshylyqtyń aldyn-alý máselelerine egjei-tegjeili toqtalyp ótti.
Alqa otyrysynda qoǵamdyq múddelerdi qorǵaý salasyndaǵy tekserýlerdiń nátijeleri týraly aityldy. Prokýrorlardyń kómegimen 30 myń qyzmetkerdiń jalaqysy ótelgen. Bereshektiń jalpy somasy 2 mlrd. teńgeden astam.
Prokýrorlyq yqpal etý aktileri boiynsha 17 myńnan astam adam ártúrli jaýapkershilikke tartyldy. Memleket kirisine 30 mlrd teńge óndirip alynǵan. 37 myń paidalanylmaityn jer telimderi keri qaitaryldy.
Sottarda 47 mlrd teńge somasynda memlekettiń múddesi qorǵalǵan.
Bas Prokýror Memleket Basshysy Joldaýynyń negizgi baǵyttaryna airyqsha mán berdi. Qylmystyq protseste zańdylyqty qamtamasyz etýde jáne adam quqyqtaryn saqtaýda prokýrorlardyń úilestirýshi róline basa nazar aýdardy.
Aǵymdaǵy jyly prokýrorlar 219 adamdy negizsiz qýdalaýdy toqtatty. Qyzmettik úi-jailardan jáne izoliatorlardan 725 zańsyz ustalǵan adam bosatylǵan.
Prokýrorlardyń ótinishteri men narazylyqtary boiynsha sottar 1172 azamatqa qatysty úkimdi qaita qarady. Prokýrorlardyń bastamasymen 36 adam aqtalǵan.
Qadaǵalaý organynyń jumysyn qorytyndylai kele, Ǵizat Nurdáýletov azamattardyń konstitýtsiialyq quqyqtaryn qorǵaý, qoǵamda quqyqtyq tártipti qamtamasyz etý boiynsha barlyq kúsh-jigerdi jumsaýdy tapsyrdy.
«Prokýratýra organdarynyń qoljetimdiligin odan ári arttyrý qajet. Árbir aryz boiynsha jedel ári tynymsyz jumys isteý kerek. Jurtshylyqpen etene qarym-qatynas- negizgi basymdyqtardyń biri. Biz resmi kózqarastan múldem arylýymyz qajet», - dep túiindedi sózin Bas Prokýror.
«Alqa otyrysynyń qorytyndysy boiynsha qadaǵalaý vedomstvosynyń basshysy aldaǵy jylǵa arnalǵan basym mindetterdi aiqyndap, negizgi baǵyttardy belgiledi», delingen Bas prokýratýranyń baspasóz habarlamasynda.
