Foto: gov.kz
Áleýmettik jelilerde bala kezinde zorlyq kórgenin aitqan jas jigittiń beineúndeýi tarady. Beinejazba avtory Nurǵali Nuǵman prodiýser tarapynan zorlyq-zombylyq kórgenin málimdedi, dep habarlaidy Ult.kz.
Osyǵan bailanysty Almaty qalalyq politsiia departamenti atalǵan materialdyń zańǵa sáikes tirkelgenin habarlady. Qazirgi ýaqytta protsessýaldyq tekseris bastalǵan.
Politsiia málimetinshe, videoda aitylǵan barlyq jait jan-jaqty zerttelip jatyr. Sondai-aq oqiǵaǵa qatysy bolýy múmkin tulǵalar men kýágerler anyqtalýda.
«Balalarǵa qatysty yqtimal zorlyq-zombylyq faktileri boiynsha barlyq ótinish mindetti túrde quqyqtyq baǵalaýǵa jatady jáne erekshe baqylaýda bolady», – dep málimdedi departamenttiń baspasóz qyzmeti.
Quqyq qorǵaý organdary atalǵan derekter rastalǵan jaǵdaida Qazaqstan zańnamasyna sáikes tiisti sharalar qabyldanatynyn atap ótti.
Aita keteiik, Nurǵali Nuǵman alǵashqy málimdemesinde oqiǵa Balapan telearnasynda jumys istegen kezinde bolǵanyn aitqan. Alaida keiin ol bul jaittyń arnaǵa emes, kommertsiialyq jobaǵa qatysty ekenin naqtylap, telearna ujymynan keshirim surady.
