Úkimet birqatar problemalyq energetikalyq nysandy memleket menshigine qaitarý máselesin pysyqtap jatyr, - dep habarlaidy "Ult aqparat" primeminister.kz saityna silteme jasap.
"Qazirgi ýaqytta QR Úkimeti men Bas prokýratýra birqatar JEO-ny memleket menshigine qaitarý boiynsha aldyn ala jumys júrgizip jatyr. Bul másele 24 qarashada Ekonomikany demonopolizatsiialaý jónindegi komissiianyń otyrysynda qaraldy.
Ekibastuzdaǵy jaǵdaiǵa qatysty. Jeksenbi, 27 qarashada, jylý jelilerindegi jelilik sýdy kóp tutynýǵa bailanysty qalalyq JEO-da qazandyq agregattary toqtady. Oqiǵa saldaryn joiý boiynsha shuǵyl túrde shtab quryldy, apattyq-qalpyna keltirý jumystary bastalyp, jedel jeli ashyldy.
28 qarasha, saǵat 11:00-degi jaǵdai boiynsha JEO-da 6 qazandyq jumys istep tur. 129 kópqabatty jáne 114 jeke úidi, 11 áleýmettik nysandy jylýmen jabdyqtaý qalpyna keltirildi", - delingen habarlamada.
Problemalyq energetikalyq nysandardyń qyzmeti máseleleri boiynsha jumys biyl naýryzda qurylǵan Ekonomikany demonopolizatsiialaý jónindegi komissiia sheńberinde de jalǵasady.
"Jalpy, osy ýaqyt ishinde respýblika menshigine telekommýnikatsiia, temirjol infraqurylymy (439 kirme t/j joldary) jáne ekologiia salalaryndaǵy 10 iri kompaniianyń aktsiialar paketi men qatysý úlesi qaitaryldy. Taý-ken ónerkásibi salasyndaǵy 142 kirme t/j joldary men aktivteri bar 28 kompaniianyń qatysý úlesi memleket menshigine qaitarý satysynda. Taǵy 20 nysan boiynsha pysyqtaý jumystary júrgizilip jatyr, onyń ishinde birqatar JEO, munai-gaz jáne t/j sektorlarynyń óndiristik obektileri, logistikalyq, mashina jasaý aktivteri jáne t.b. bar", - delingen habarlamada.
Buǵan deiin Prezident Qasym-Jomart Toqaev Premer-ministr Álihan Smaiylovqa qalalardaǵy problemalyq energetikalyq aktivterdi memleket menshigine qaitarý máselesin qaraýdy tapsyrǵan bolatyn.
Eske salaiyq, ekibastuzdyqtar jylý elektr ortalyǵyndaǵy birneshe qazandyqtyń toqtap qalýyna bailanysty jylýsyz qaldy. Keiin JEO-daǵy apatqa qatysty Energetika ministrligi pikir bildirgen bolatyn.
