Áleýmettik jelide Vladimir Pýtinge jaqyn júretin biznesmen jáne "Vagner" jekemenshik áskeri kompaniiasyn (ChVK Vagner) qurýshylardyń biri Evgenii Prigojinniń Ýkrainadaǵy soǵysqa qatysqan túrme tutqyndarymen áńgimesi bar video paida boldy. Prigojin sóilesip otyrǵan tórt adam da aiaqtarynan aiyrylǵan.
Baza basylymy soǵysqa barǵany úshin tutqyndarǵa raqymshylyq jasalǵan dep habarlaidy. Prigojinmen sóilesken tórteýdiń biri asa aýyr qylmys jasaǵany úshin 23 jylǵa sotttalyp, on jylyn túrmede ótkizgen. Oǵan "Buryn sottalǵan adam ediń, qazir soǵysqa qatysqan batyrsyń", - degen Prigojin "ómir boiy mashyqtanǵandar (áskeri jaǵdaiǵa) qashyp jatyr, al eshkim eshteńe úiretpegender alǵa umtylady, óitkeni olarǵa báribir" dep sóilegen.
Prigojinmen sóilesken tutqyndardyń ekeýi aiaqtaryna protez jasatqan soń "ChVK Vagnerge" qaita oralatynyn aitqan. Oǵan Prigojin "kompaniiadan ne zeinetke, ne kórge ketýge bolady" dep jaýap bergen.
Videonyń qaida, qashan jazylǵany belgisiz.
Resei áskeri kóktemde Ýkraina jerinde jeńile bastaǵanda, "Vagner" jekemenshik áskeri kompaniiasy Resei túrmelerinde otyrǵan tutqyndardy soǵysqa tarta bastaǵan. Olardy úgitteýmen Evgenii Prigojinniń ózi ainalysyp, ondaǵan túrmeni aralaǵan. Soǵysqa qatysýǵa kelisim bergen tutqyndar jarty jyl alǵy shepte júrýge tiis, olarǵa sheginýge, tutqynǵa túsýge jol berilmeidi. Alty ai shydap, tiri qalǵandarǵa raqymshylyq jasalady. Qyrkúiekte "Vajnoe istorii" basylymy "Vagner" jekemenshik kompaniiasy alty myńnan astam tutqyndy qalai tartqanyn habarlaǵan.
"ChVK Vagner" ("Vagner" jekemenshik áskeri kompaniiasy) – Reseidiń beiresmi áskeri bólimshesi. Bul bólim áskeri vedomstvolardyń balansy men zańdy tulǵalardyń reestrinde joq. Biraq onyń jaýyngerleri Siriia, Afrika jáne Ýkrainadaǵy soǵys áreketterine qatysyp júr. Bul kompaniia Ýkraina jerindegi Resei bólimsheleriniń ishinde neǵurlym soǵysqa qabiletti áskeri bólim sanalady. Bólimniń jaýyngerleri kóptegen áskeri qylmystarǵa qatysqan degen kúdik bar. "ChVK Vagnerdi" qurýshy ári demeýshileriniń biri - Vladimir Pýtin ainalasynda júrgen biznesmen Evgenii Prigojin. Keiingi kezderi ol Resei qorǵanys ministrligindegi joǵary laýazymdy sheneýnikterdi ashyq ta qatań synai bastaǵan. Muny Kremldiń maquldaýymen istep júr degen boljamdar aitylǵan.
