Búgin Qazaqstan Respýblikasynyń Prezidenttigine kandidat Jigýli Dairabaevtyń úgit-nasihat naýqany talqylanǵan «Aýyl» halyqtyq-demokratiialyq patriottyq partiiasy Respýblikalyq qoǵamdyq shtabynyń qorytyndy otyrysy ótti. Is-sharaǵa Jigýli Dairabaevtyń ózi, partiianyń óńirlik filialdarynyń, óńirlik shtabtardyń basshylary men músheleri qatysty, dep habarlaidy partiianyń baspasóz qyzmeti.
«Aýyl» partiiasy sailaý naýqanyn ótkizý barysynda elimizdiń barlyq 20 óńirin qamtydy. Búkil el boiynsha 222 shtab jumysy uiymdastyryldy. Úgit-nasihat sharalary barlyq 88 qala men 166 aýyldyq aýdanda ótti. Óńirlik shtabtar 2500-den astam is-shara ótkizdi.
Úgit-nasihat sipatyndaǵy 200 myńnan astam baspa ónimi óndirilip, taratyldy, 300-den astam bilbord ornatyldy.
Jigýli Dairabaev bastaǵan úgit toby elimizdiń 17 óńiriniń, onyń ishinde respýblikalyq mańyzy bar úsh qalanyń sailaýshylarymen kezdesti. Kandidattyń senimdi ókilderi barlyq 20 óńirde kezdesýler ótkizdi.
Kandidat agroónerkásiptiń óndiristik ortalyqtaryna baryp, olardyń qyzmetimen tanysty, jumysshy ujymdardyń tilekterin tyńdady. Sonymen qatar, ol óńir turǵyndary – densaýlyq saqtaý, bilim berý, mádeniet, ónerkásip qyzmetkerlerimen, shyǵarmashylyq ziialy qaýym ókilderimen, ardagerlermen kezdesýler ótkizdi, óziniń sailaýaldy baǵdarlamasynyń negizgi baǵyttaryn tanystyryp, sailaýshylardyń suraqtaryna jaýap berdi.
««Aýyl» partiiasy bul joly barynsha barlyq turǵyndy qamtyp, 2500-den astam is-shara ótkizdi, bul aldyńǵy sailaý naýqanyna qaraǵanda 3 ese kóp», – dedi respýblikalyq qoǵamdyq shtab basshysy Tóleýtai Rahymbekov.
Úgit-nasihat naýqany áleýmettik jelilerde de, BAQ-ta da júrgizildi. «Aýyl» partiiasynyń akkaýnttarynda sailaý aldyndaǵy úgitti ótkizý barysy týraly 500-ge jýyq jariialanym jariialandy. BAQ-ta 3000-nan astam material, onyń ishinde kandidattyń «Egemen Qazaqstan» jáne «Kazahstanskaia pravda» respýblikalyq gazetterine bergen suhbaty jaryq kórdi. Jalpy, media keńistikte 10 millionnan astam adam qamtyldy.
20 qarasha – sailaý kúni «Aýyl» partiiasynyń ókilderi 6 myńnan astam sailaý ýchaskesine baqylaýshy retinde tartylatyn bolady.
Otyrys sońynda QR Prezidenttigine kandidat Jigýli Dairabaev partiia múshelerine birlesken jumys úshin alǵys aitty.
