Sotsyz jazalaýǵa kirisýdi talap etkenderdi qoldaýǵa bolmaidy, óitkeni QR Prezidentiniń 2019 jyldyń jeltoqsan aiynda Qylmystyq kodekske engizgen túzetýleri balalarǵa qatysty qylmystar boiynsha qatań jazalaýǵa kepildik beredi. Osyndai pikirdi Facebook-tegi paraqshasynda Qazaqstan zańgerler odaǵynyń elordadaǵy filial tóraǵasy Serik Berkamalov bildirdi, dep habarlaidy QazAqparat.
«Búgin tańerteńgi tragediia tek Sátbaev qalasynyń turǵyndaryn ǵana emes, bárimizdiń júregimizdi aýyrtty.
Kishkene balaǵa zorlyq jasaǵan adamdy bastapqyda ashýǵa berilip, sol jerde atyp tastaǵyń, ońbaǵandy tiridei parashalap tastaǵyń keledi. Jasyratyny joq áke retinde mende sondai kúide bolar edim. Bárimiz adambyz, kúdiktini óz qolymen jazalaǵasy kelgen ashýly topty túsinýge bolady, biraq qoldaýǵa bolmaidy. Toptyń ashý-yzasynyń sebebi túsinikti, jyl saiyn osyndai qylmys kóbeiip ketti, jaza jeńildetile berdi, al qylmysker túrmeden merziminen buryn bosatyldy. Túngi toptyń oiynda osy bolǵan shyǵar.
Alaida kóbi Prezident Qasym-Jomart Toqaevtyń osy sebeppen byltyr jeltoqsan aiynda Qylmystyq kodekske jaýapkershilikti túbegeili kúsheitý týraly ózgerister engizýge qatysty qol qoiǵanyn bilmeidi. Endi Qylmystyq kodekstiń 120-baby boiynsha balaǵa zorlyq kórsetýge eń joǵary jaza – 20 jyl bas bostandyǵynan aiyrý nemese ómiriniń sońyna deiin bas bostandyǵynan aiyrýdy kózdeidi. Eshqandai jeńildik joq, tek joǵary merzimge. Budan basqa, sot himiialyq kastratsiia túrinde májbúrli sharany qoldanýǵa quqyly, keshegi qylmys boiynsha bul áreket – eń ádil jáne durys bolar edi!», - dep atap ótti Serik Berkamalov.
Onyń aitýynsha, toptyń ózi jazalaýǵa kirisýi – jaýapkershilik sharasy emes, bul halyqtyń quldyraý formasy, biz tarihqa qarasaq taspen atqylap óltirý, qandy kek alý jáne osyǵan uqsas varvarlyq «ádil sot» jaqtaýshysy bolǵan emespiz. Qandai qylmys jasalsa da, ol bi sotymen tarazyǵa salynyp qaralatyn, biz de osy danalyqqa negizdelgen dástúrdi saqtaýymyz kerek.
Serik Berkamalovtyń atap ótýinshe, bulai kete berse biz basqalardyń sotsyz jazalaýǵa kirisýine jol ashamyz. Sol kezde qylmys ornynda kezdeisoq ustalyp, ashýly toptyń qolyna túsip jazyqsyz jazalanyp ketseńiz, tańǵalmańyz. Ondaida ádil sottan úmit kútpeńiz.
«Qylmysker qatań ári ádil jazasyn alatynyna daý joq. Mundai qylmystarǵa ólim jazasyn taǵaiyndaýdy qaitarýǵa da bolady. Alaida jazany kúsheitý máseleni tolyq sheshpeidi. Balalarymyzdyń densaýlyǵy men ómirine qol suqpaýshylyqty qaitaryp bermeidi. Bul jerde memlekettiń basty mindeti – mundai faktilerdi túp-tamyrymen joiý, zorlyqtyń aldyn alý jáne ony boldyrmaý júiesin qurý. Bul – tereńirek oilanatyn jait», - dep túiindedi sózin Qazaqstan zańgerler odaǵynyń elordadaǵy filial tóraǵasy Serik Berkamalov.
