Memleket basshysy Qasym-Jomart Toqaevtyń byltyrǵy atqarǵan qyzmeti týraly úshtomdyq jinaq jaryqqa shyqty, Bul týraly Prezidenttiń baspasóz hatshysy Berik Ýáli Facebook paraqshasynda jazdy, dep habarlaidy "Ult aqparat".
Atalǵan jinaqta Memleket basshysynyń ishki saiasi is-sharalarda, shetelde ótken jiyndarda sóilegen sózderi jáne onyń otandyq, halyqaralyq máselelerge qatysty úndeýleri men málimdemeleri qamtylǵan. Sonymen qatar kitapqa Qasym-Jomart Toqaevtyń 2021-2022 jyldardaǵy Qazaqstan halqyna arnaǵan joldaýlary endi. 2021 jyly Qazaqstan COVID-19 pandemiiasynyń saldaryn joiýǵa, elimizdiń áleýmettik-ekonomikalyq ósimin qaita qalpyna keltirýge basa mán berdi. Bul Prezidenttiń jumys kestesinen de anyq kórindi.
Jinaqtyń birinshi tomyna Memleket basshysynyń 2021 jylǵy naýryz ben jeltoqsan aralyǵynda elimizdiń jáne óńirlerdiń áleýmettik-ekonomikalyq damý máselelerine qatysty keńesterde, Úkimettiń, Qazaqstan halqy Assambleiasynyń, Ulttyq qoǵamdyq senim keńesiniń otyrystarynda, «Astana» halyqaralyq qarjy ortalyǵyn basqarý jónindegi keńeste jáne basqa da jiyndarda sóilegen sózderi toptastyryldy. Budan bólek Prezidenttiń memlekettik merekeler men qoǵamdyq mańyzy bar ataýly kúnderge bailanysty quttyqtaýlary engizildi. Ásirese, Qasym-Jomart Toqaevtyń 2021 jylǵy qyrkúiektegi «Halyq birligi jáne júieli reformalar – el órkendeýiniń berik negizi» atty Qazaqstan halqyna Joldaýyn erekshe atap ótken jón.
Ekinshi tom 2022 jyldyń qańtary men naýryz aralyǵyn qamtidy. Atalǵan kezeń elimizdegi «Qasiretti qańtar» oqiǵasymen erekshelendi. Memleket basshysynyń erik-jigeri men batyldyǵynyń, sondai-aq barsha otandasymyzdyń birligi men yntymaǵynyń arqasynda elimiz osy aýyr synaqty eńsere bildi. Bul jinaqta Qasym-Jomart Toqaevtyń qańtar oqiǵasyna qatysty halyqqa arnaǵan málimdemeleri men úndeýlerine, sondai-aq «Habar» jáne «Qazaqstan» telearnalaryna bergen suhbatyna airyqsha nazar aýdarýǵa bolady. Sonymen qatar ekinshi tomǵa Memleket basshysynyń «Jańa Qazaqstan: jańarý men jańǵyrý joly» atty naýryz aiyndaǵy Joldaýy endi. Bul Joldaýda kóterilgen negizgi másele – aýqymdy reformalar men Jańa Qazaqstandy qurý.
Álemde bolyp jatqan saiasi jáne áleýmettik tendentsiialar men oqiǵalar Qazaqstannyń halyqaralyq arenadaǵy qyzmetin jandandyra tústi. Memleket basshysynyń ótken jylǵy jumys kestesi aýqymdy boldy.
Úshinshi jinaqqa Prezidenttiń iri forýmdarda, sondai-aq jaqyn jáne alys shet elderge jasaǵan saparlarynda sóilegen sózderi endi.
Qasym-Jomart Toqaev ótken jyly Tájikstan, Koreia Respýblikasy, Resei Federatsiiasy, Túrikmenstan, Belgiia men Shveitsariiaǵa saparmen bardy. Budan bólek Prezident Túrkitildes memleketter yntymaqtastyǵy keńesiniń VIII sammitine qatysý úshin Túrkiiaǵa bardy. Memleket basshysynyń BUU Bas Assambleiasynyń otyrystaryndaǵy jáne osy jahandyq uiymnyń basqa da is-sharalaryndaǵy beinebailanys arqyly sóilegen sózderi de atalǵan jinaqqa toptastyryldy. Sondai-aq bul tomǵa Qasym-Jomart Toqaevtyń jyl saiyn ótetin halyqaralyq is-sharalarda sóilegen sózderi engizildi. Atap aitqanda, Joǵary Eýraziialyq ekonomikalyq keńes, Ashhabad qalasynda ótken Ortalyq Aziia elderi basshylarynyń konsýltativtik kezdesýi, Dýshanbe qalasynda ótken UQShU men ShYU otyrystary.
"Budan bólek Prezidenttiń «Essentiel des Relations internationales» jýrnalyna jáne reseilik belgili jýrnalist jáne telejúrgizýshi Leonid Mlechinge bergen suhbattary, Prezidenttiń «The Parliament» jýrnalynda jariialanǵan «Partnership with the EU will anchor Kazakhstan’s future progress» maqalasy endi.
Qazaqstan Respýblikasy Prezidentiniń Baspasóz qyzmeti Qasym-Jomart Kemelulynyń bir jylǵy qyzmetiniń qorytyndysy retinde osy jinaqty oqyrmandarǵa usynyp otyr. Sondai-aq jinaqta Memleket basshysynyń qatysýymen ótken is-sharalarda túsirilgen sýretter berildi. Kitapta jariialanǵan materialdardy qyzyǵýshylyq tanytqan zertteýshiler men memlekettik organdardyń qyzmetkerleri úshin qundy ári paidaly qujat dep sanaimyz.
Esterińizge sala keteiik, Memleket basshysynyń sóilegen sózderi osymen úshinshi jyl jinaq bolyp shyǵyp otyr" - dep jazady Berik Ýáli.
