Qazaqstan Prezidentiniń Abai týraly maqalasy qazaqstandyqtarǵa jańa biiktikterge umtylýǵa jol ashady. L.Gýmilev atyndaǵy Eýraziia ulttyq ýniversiteti janyndaǵy «Abai akademiiasy» ǵylymi-zertteý institýtynyń direktory, tarih ǵylymdarynyń kandidaty Erlan Sailaýbai osyndai pikir bildirdi, dep habarlaidy QazAqparat.
«Prezident Qasym-Jomart Toqaevtyń Abaidyń 175 jyldyǵyna arnalǵan «Abai jáne XXI ǵasyrdaǵy Qazaqstan» atty maqalasy memleketimiz ben halqymyz úshin tarihi turǵydan asa mańyzdy jyldyń basynda shyǵýy zańdylyq ári kópten kútken dúnie. Memleket basshysynyń ulttyq-strategiialyq jáne memlekettik-ideologiialyq arnada jazylǵan maqalasynyń ózegi – qazaqtyń dana tulǵasy Abai Qunanbaiuly. Abai murasyndaǵy adam men qoǵamnyń úilesimdi damýyna qatysty kózqarastar búgingi elimiz ben ultymyzdyń jańǵyrýyna birden-bir jańa serpin, tyń ideialar beretin ǵibraty mol jáne erekshe sipatta ekendigi maqalanyń ult bolmysynyń úlgisi, memleket isiniń múddelisi, jańa qoǵamnyń janashyry syndy ózekterinde aiyryqsha taldanǵan ári tujyrymdalǵan», - dedi ǵalym.
Onyń atap ótýinshe, álemdegi árbir ult órkenietti damý jolynda memleketiniń órkendeýine eren yqpal etý qabileti zor bolmystaryna, sonyń ishinde tarihi tulǵalar murasyna qaita oralyp, únemi zerdelep otyrǵan.
«Ýaqyt ótken saiyn tulǵalardyń adamzat ómiriniń ár alýan qyrlaryn tereńinen qarastyryp, adam men qoǵamnyń údemeli damý negizderin aiqyndap beretin kózqarastaryn basty qundylyq retinde jańa zaman lebimen úilestire jańǵyrtqan. Prezident Qasym-Jomart Toqaevtyń «Abai jáne XXI ǵasyrdaǵy Qazaqstan» atty maqalasy túptep kelgende bizge, qazaqstandyqtarǵa jańa biiktikterge umtylýǵa jol ashqan zor dúnie dep qabyldaimyz», - dedi Erlan Sailaýbai.
