Qazaqstan Respýblikasynyń Ulttyq banki elimizdegi shaǵyn jáne orta kásip ielerin jeńildikpen nesieleýdiń jańa baǵdarlamasyn ázirlep jatyr, dep habarlaidy QazAqparat.
Aita ketsek, QR UEM kásipkerlikti damytý departamentiniń direktory Shyńǵys Ahmetov OKQ-da onlain rejimde ótken baspasóz máslihatynda «Biznestiń jol kartasy – 2025» baǵdarlamasy sheńberinde shaǵyn jáne orta biznes ielerine memleket qandai qoldaý sharalaryn kórsetetinin málim etken edi.
Sondai-aq departament direktory «Qarapaiym zattar ekonomikasy» baǵdarlamasyna da qazirgi jaǵdaiǵa bailanysty kóptegen salanyń qosylatyndyǵyn atap ótti. «Biz osy baǵdarlama sheńberinde qoldanylatyn salalar tizbesin keńeittik. Mysaly kúrish ósirýshiler, naýbailar, konditerlik ónim óndirýshiler, jeńil metall konstrýktsiialaryn jasaý sekildi salalar osy baǵdarlama sheńberine engizildi», - dedi Shyńǵys Ahmetov.
Departament direktory Memleket basshysynyń tapsyrmasyna sáikes baǵdarlama boiynsha jobalardy qarjylandyrý úshin jalpy nesieleý kólemi 1 trln teńgege deiin ulǵaiǵanyn jetkizdi. Buryn bul baǵdarlama sheńberinde bólingen qarajattyń kólemi – 600 mlrd teńge bolatyn.
«1 trln teńgeniń ishinde 700 mlrd teńge agroónerkásip kesheni salasyndaǵy óńdeý men óndirýge, 300 mlrd teńge óńdeýshi ónerkásip pen qyzmet kórsetý salasyna baǵyttalady. Sonymen birge Memleket basshysynyń tapsyrmasyna sáikes 100 mlrd teńge kóktemgi egis jumystaryna jiberiledi. «Qarapaiym zattar ekonomikasy» baǵdarlamasy boiynsha nesieniń 5 mlrd teńgege deiin – kepildendik mólsheri 30 paiyzdy quraidy. Eger qarjylandyrý suranysy 3 mlrd teńgeden aspaityn bolsa memleket tarapynan beriletin kepildik 50 paiyzdy quraidy», - dedi ol.
Shyńǵys Ahmetov óz sózinde «Biznestiń jol kartasy - 2025» jáne «Qarapaiym zattar ekonomikasy» baǵdarlamalary boiynsha operator – «Damý» qory bolyp qala beretinin jetkizdi.
«Atalǵan sharalarmen qatar QR Ulttyq banki tótenshe jaǵdai kezinde zardap shekken shaǵyn jáne orta biznesti jeńildikpen nesieleýdiń jańa baǵdarlamasyn iske asyrýǵa kiristi. Osy maqsatqa 600 mlrd teńge bólinedi. Nesie merzimi – 1 jylǵa deiin 8 paiyzdyq mólsherlememen ainalym qarajatyn tolyqtyrýǵa beriledi», - dedi departament direktory.
