Prezidenttik jastar kadr rezervi - daryndy jastar úshin ashyq jáne tiimdi áleýmettik saty. Mundai pikirdi «Qazaqkontsert» memlekettik kontserttik uiymynyń direktory, Qazaqstannyń eńbek sińirgen qairatkeri Jeńis Seidýllauly aitty, dep habarlaidy "Ult aqparat".
«QR Prezidenti Qasym-Jomart Toqaevtyń saiasi baǵdarlamasyndaǵy negizgi basymdyqtardyń barlyǵy birtindep iske asyp jatqanyn kórýge bolady. Sonyń biri – bilimdi jastardy memlekettik qyzmetke tartý. Memleket basshysynyń «Prezidenttik jastar kadr rezervin qalyptastyrý» týraly Jarlyǵy - osynyń aiqyn dáleli. Prezidenttik kadrlyq rezervti qurý ideiasy elimizdegi jetekshi basqarýshy quramdy jańa sapaly deńgeige kóterýge baǵyttalǵan jaqsy bastama dep bilemin. Bul – daryndy jastar úshin ashyq jáne tiimdi áleýmettik saty. «Jastar - aldaǵy reformalardyń negizgi qozǵaýshy kúshi» dep Memleket basshysy atap ótkendei, Úkimet qazirgi joǵary laýazymdy memlekettik qyzmettegi aǵa býynnan keiin bilikke keletin jas mamandarǵa úlken senim artýda», - dedi Qazaqstannyń eńbek sińirgen qairatkeri.
Onyń paiymynsha, Prezident qabyldaǵan mańyzdy Jarlyq, bir jaǵynan, jastarǵa jol ashsa, ekinshi jaǵynan, elimizdegi kadrlyq saiasatty da jaqsarta túspek. Sonymen qatar bul bilimdi, bilikti, eńbekqor jastar úshin bul taptyrmas múmkindik.
«Jańa ideialardy usynýǵa qabiletti, ózindik kózqarasy qalyptasqan, jańashyldyqqa beiim, tez sheshim qabyldai alatyn jas kóshbasshylardy qoldaý arqyly elimiz jańa belesterdi baǵyndyrady dep oilaimyn. «Jas kelse – iske» demekshi, qabiletti jastar osy múmkindikti durys paidalanyp, Qazaqstannyń qaryshtap damýyna óz úlesin qosýy kerek. Prezidenttik kadr rezervine enýdiń sharty qiyn emes. Irikteýge respýblika boiynsha 35 jasqa deiingi joǵary bilimi men 5 jyl jumys ótili bar kez kelgen jas qatysa alady», - dedi Jeńis Seidýllauly.
Aita keteiik, Ulyqtaý rásiminde Memleket basshysy Qasym-Jomart Toqaev Prezidenttik kadrlyq rezerv qurylatynyn málimdedi. Al tamyz aiynyń sońynda Q.Toqaevtyń Jarlyǵymen QR Prezidentiniń janyndaǵy Jastar kadr rezervi jónindegi ulttyq komissiia quryldy. Osy jyldyń qyrkúiek aiynda Prezidenttik jastar kadr rezervine ótinim qabyldaý bastaldy.
.jpeg)