Prezidenttiń kómekshisi Erlan Qarin Prezidenttik jastar kadrlyq rezervindegi azamattardyń ministrlermen kezdesýi nelikten uiymdastyrylǵanyn aityp berdi, dep habarlaidy QazAqparat.
«Jas mamandarmen kezdesý arqyly Prezidenttiń jańa Joldaýyndaǵy jańa bastamalary jóninde sóz qozǵap, olardyń mańyzdylyǵyn birge talqylaýdy jón kórip otyrmyz. Joldaýdy qalai júzege asyramyz? Qandai qosymsha sharalardy qabyldaý kerek? Nelikten? Sebebi Joldaýda aitylǵan bastamalardy júzege asyratyn – búgingi zalda otyrǵan jas mamandar. Búgingi kezdesý bizdiń túsinigimizdegi úgit-nasihat maqsatyndaǵy túsindirme jumysy emes, Joldaýdaǵy aitylǵan bastamalardy birlese otyryp talqylaý jáne olardy erteń júzege asyrý. Sebebi búgingi sharaǵa kelgen jas mamandar – ártúrli ministrlik pen ákimdikten kelgen azamattar», - dedi Erlan Qarin Prezidenttik jastar kadrlyq rezervindegi azamattarmen kezdesý kezinde.
Onyń aitýynsha Prezidenttik jastar kadrlyq rezervin qurý – Memleket basshysynyń sailaýaldy baǵdarlamasynyń negizgi ideialarynyń biri bolǵan.
«Sailaýdan keiin kadrlyq rezervti jasaqtaý jumysyna kirisip, irikteý jumysy úsh aiǵa sozyldy. Sonyń arqasynda úsh júzge jýyq jas maman irikteldi. Qazirgi ýaqytta olardyń jartysynan kóbi – 152 maman ártúrli qyzmetke taǵaiyndaldy. Sondyqtan jas mamandar búgingi kúni ózderiniń múmkindikterin synaýda», - dedi ol.
Eske sala ketsek búgin elordada Prezidenttik kadrlyq rezervtegi jastar birqatar ministrmen kezdesý ótkizdi. Naqtyraq aitqanda iriktelip, rezervke engen jastarmen kezdesýge Aqparat jáne qoǵamdyq damý ministri Aida Balaeva, Tsifrlyq damý, innovatsiialar men aeroǵarysh ónerkásibi ministri Baǵdat Mýsin, Prezident ákimshiligi basshysynyń orynbasary Málik Myrzalin, sondai Prezidenttiń kómekshisi Erlan Qarin shaqyrylǵan. Basqosýdyń basty maqsaty – Prezident Joldaýyn talqylap, aldaǵy ýaqytta Prezidenttik jastar kadrlyq rezervin damytyp, júzege asyrýdy josparlaý.
