Qasym-Jomart Toqaevqa «Samuryq-Qazyna» UÁQ» kompaniialar tobynyń 9 aidaǵy jumysynyń qorytyndylary týraly esep berildi, dep habarlaidy "Ult aqparat" Aqordaǵa silteme jasap.
Ahmetjan Esimovtiń málimetinshe, eseptik kezeńdegi taza tabys josparlanǵan 167 mlrd teńgeden 2,6 esege asyp, 436 mlrd teńgege jetken. Biyl aktsioner – QR Úkimetine 120 mlrd teńge dividendter tólenip, 2017 jylǵy kórsetkishpen salystyrǵanda 10 ese artyq. Sondai-aq energetikalyq, munai-gaz, ýran, telekommýnikatsiialar, poshta jáne basqa da salalardaǵy kompaniialar tobynyń barlyq kásiporyndarynda úzdiksiz jumys qamtamasyz etildi. Óndiristegi jumys oryndary jappai qysqartýǵa ushyramai, personal tolyq quramda saqtaldy, qyzmetkerlerge eńbekaqy ýaqytyly tólenip otyr.
«Samuryq-Qazyna» basshysy Qor satyp alýlar júiesi arqyly el ekonomikasyn qoldaýǵa qatysty Memleket basshysynyń tapsyrmalaryn oryndaý jónindegi jumysty jalǵastyryp jatqanyn habarlady. Biylǵy 9 aidyń qorytyndysy boiynsha Qordyń satyp alýlar júiesindegi jergilikti ónim úlesi 66% qurady. Básekelestik ortaǵa 819 mlrd teńgege satyp alýlar shyǵarylǵan. Biznestiń 17 000 sýbektisi Qordyń satyp alýlaryna qatysýǵa múmkindik aldy. 2020 jyldyń basynan beri kompaniialar toby 2,4 trln teńgege otandyq biznespen sharttar jasasyp, jergilikti kásiporyndarǵa 12 myń tapsyrys berilgen. Atalǵan kásiporyndarda 280 myń adam jumys isteidi. Esep boiynsha memlekettik biýdjetke 170 mlrd teńge kóleminde salyq tólemderi túsýi tiis.
Sondai-aq Qazaqstan Prezidentine Qordy investitsiialyq holdingke ainaldyrý tujyrymdamasy usynyldy.
Basqarma basshysy Ahmetjan Esimov Qasym-Jomart Toqaevqa investitsiialyq holdingke ainaldyrýdyń artyqshylyqtary týraly aitty. Onyń sózinshe, bul portfeldi aktivterdiń geografiia jáne salar boiynsha ártaraptandyrýǵa, halyqaralyq investitsiialardan túsetin tabysyn arttyrýǵa, dividendterdiń esebinen biýdjet túsimderin arttyrýǵa múmkindik beredi.
Memleket basshysyna Joldaýdaǵy tapsyrmalarǵa sáikes, Qor aktivterin jekeshelendirý baǵdarlamasy jalǵasa beretini týraly habarlandy. Bul rette, Qor memlekettik jáne jeke menshik múddeler arasyndaǵy tepe teńdikti qamtamasyz etý maqsatynda iri jáne strategiialyq kompaniialardaǵy úlesin 51 jáne odan da kóp paiyzyn baqylaýdy saqtap qalady.
