Memleket basshysy Qasym-Jomart Toqaev Kásipkerler quqyn qorǵaý jónindegi ýákil Rústem Júrsinovti qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaevqa kásipkerler quqyn qorǵaý máselesi boiynsha atqarylǵan jumystar men otandyq biznesti qoldaýǵa qatysty jospar jaiynda baiandaldy.
Rústem Júrsinov Qazaqstan Prezidentine sońǵy 4 jyl ishinde 25 myń ótinish qaralyp, onyń 43 paiyzy oń sheshilgenin, kásipkerlerdiń 197 milliard teńge kólemindegi múliktik quqyqtary qorǵalǵanyn aitty. Biznes-ombýdsmenniń aitýynsha, sanitarlyq talaptardy saqtaý jóninde tártip ázirlendi, kásipkerlerdiń, olardyń jumysshylary men tutynýshylarynyń arasyndaǵy jaýapkershiligi aiqyndaldy.
Memleket basshysyna koronavirýs pandemiiasynyń otandyq bizneske tigizgen saldary jáne kásipkerlerge qoldaý kórsetý jónindegi usynystar týraly aqparat berildi. Naqty aitqanda, eńbekaqy tóleý qory, jer qatynastary, salyq máseleleri jan-jaqty aityldy.
Qasym-Jomart Toqaev jer qatynastary men eńbekaqy tóleý qoryna salmaq túsirmeitin jańa retteý saiasaty jónindegi ózgeristerdi tiisti memlekettik organdar muqiiat zertteýi qajet ekenin atap ótti. Prezident «Bir kózden satyp alý» portalynyń tiimdiligi men ashyqtyǵyna jiti mán berý kerek dep sanaidy.
Qasym-Jomart Toqaev Rústem Júrsinovke bizneske qatysty ákimshilik quqyq buzýshylyqtardyń artý sebepterin anyqtaýǵa, baqylaý-qadaǵalaý qyzmetin reformalaýdy ázirleýge baǵyttalǵan birqatar tapsyrma berdi.
