Jaiyq ózeniniń ekologiialyq ahýaly kúrt nasharlap barady. Memleket basshysy Qasym-Jomart Toqaev Úkimettiń keńeitilgen otyrysynda osy máselege nazar aýdarý kerektigin málim etti, dep habarlaidy "Ult aqparat".
«Sý resýrstaryn saqtaý jáne tiimdi paidalaný – asa mańyzdy mindet. Bul – ulttyq qaýipsizdik pen ornyqty damýdy qamtamasyz etý máselesi.
Meniń tapsyrmam boiynsha sý resýrstaryn basqarýdyń ulttyq jospary daiyndaldy. Ony qabyldap, qarjylandyrý isin tezdetý qajet. Qazir Jaiyq ózeniniń ekologiialyq ahýaly kúrt nasharlap barady. Byltyrǵy jeltoqsanda Qazaqstan-Resei yntymaqtastyǵynyń 2024 jylǵa deiingi baǵdarlamasy qabyldandy. Bul qujattyń negizgi maqsaty – Jaiyq ózeni ańǵarynyń ekojúiesin saqtaý.
Úkimetke ony sapaly túrde júzege asyrýdy tapsyramyn. Jalpy sý diplomatiiasynyń tásilderin aitarlyqtai nyǵaitýymyz kerek. Qazaqstan úshin bul óte qajet nárse. Sebebi tushy sý bizde óte tapshy», - dedi Qasym-Jomart Toqaev Úkimettiń keńeitilgen otyrysynda.
