QR Aqparat jáne qoǵamdyq damý ministriniń mindetin atqarýshy Aida Balaeva Memleket basshysy Qasym-Jomart Toqaevtyń Parlamenttiń búgingi sessiiasynda sóilegen sózine pikir bildirdi, dep habarlaidy "Ult aqparat".
«Búgin Memleket basshysy Parlamenttiń VII shaqyrylymynyń birinshi sessiiasyn ashý barysynda azamattyq qoǵamdy damytý, jastar saiasatyn jandandyrý, onlain-petitsiiany zańnamalyq bekitý siiaqty memlekettik saiasattyń negizgi basym baǵyttaryna kezekti ret toqtalyp ótti. Bul baǵyttardaǵy jumystyń sapaly iske asýy – birinshi kezekte elimizde demokratiia printspteriniń júieli damýyna oń yqpal etetini sózsiz. Aqparat jáne qoǵamdyq damý ministrligi atalǵan salalardaǵy jumystyń zańnamalyq tetikterin retteý boiynsha belsendi jumys atqaryp keledi. Atap aitqanda, bizdiń Ministrlik qoǵamdyq baqylaý jónindegi Tujyrymdama men Zań jobasyn ázirledi. Zańnamalyq baza – azamattyq qoǵamnyń jumysyn ary qarai jandandyryp, memlekettik organdar qyzmetiniń ashyqtyǵyn qamtamasyz etetin bolady. Sondai-aq, Ministrlik janynan 71 adamnan turatyn úlken Jumys toby quryldy. Onyń quramynda Evgenii Jovtis, Tatiana Zinovich, Akif Súleimenov, Rýstam Ashigaliev, Zaýresh Battalova siiaqty basqa da kásibi quqyqtanýshylar men sarapshylar bar», - dep jazdy Balaeva jelidegi paraqshasynda.
Sonymen qatar, ol Prezident jastar saiasaty salasyna da erekshe nazar aýdarǵanyn atap ótti.
«Atap aitqanda, «Jastardyń damý indeksi» júiesin engizýdi jáne «Jastardyń áleýmettik qyzmetteri» uǵymyn zańmen bekitýdi tapsyrdy. Búgingi tańda, bizdiń Ministrlik elimizdiń barlyq óńirindegi jastar saiasatyna qatysty máselelerdi anyqtap, olarǵa jan-jaqty taldaý jumystaryn júrgizýde. Bul óz kezeginde jastar saiasaty salasyndaǵy zańnamalyq normalardy sapaly ári tiimdi ázirleýge óz septigin tigizetin bolady. Bul oraida, depýtattyq korpýs pen Ministrlik arasyndaǵy ózara bailanys aldaǵy ýaqytta da ózara áriptestikte jalǵasyp, Memleket basshysy tapsyrǵan mindetterdi ýaqytyly ári tolyǵymen oryndaýǵa múmkindik beredi dep senemin», - dep tolyqtyrdy ol.
