Memleket basshysy Qasym-Jomart Toqaev biznes ókilderin Jańa Qazaqstandy birge qurýǵa shaqyrdy, dep habarlaidy QazAqparat.
«Kásipkerler tarapynan memleket saiasatynyń boljap bilý múmkin emestigi jáne únemi ózgerip turatyny týraly oryndy syn jii aitylady. Ótken jolǵy kezdesýde men jańa ekonomikalyq saiasat ázirleýdi tapsyrǵanmyn. Bul jumys tabysty júrip jatyr deýge kelmeidi. Tyń oilardyń tapshylyǵyn baiqap otyrmyz. Munyń daǵdarysqa qarsy sharalarǵa da qatysy bar. Blogosferada belsendi bolyp, syni eskertýler aityp júrgen kásipkerler men ekonomisterdi shaqyryp, Úkimet janynan jumys tobyn qurýdy tapsyrdym. Biraq ondai adamdar da uzaqqa barmady. Maǵan jetken málimet boiynsha, olar da naqty usynystar men ideiaǵa kelgen kezde qinalyp qalǵan. Degenmen Úkimet pen Prezident ákimshiliginen makro, salyq, biýdjet, aqsha-kredit siiaqty ekonomikanyń barlyq túrin qamtityn doktrinalyq qujat kútemin», - dedi Memleket basshysy Aqordada ótken kezdesýde.
Prezident Reformalar jónindegi joǵary ekonomikalyq keńestiń otyrysynda uiym jumysyn kúsheitý týraly tapsyrma bergenin eske saldy.
«Bul jumysty biznestiń konstrýktivti qatysýy arqyly júrgizgen jón. Óitkeni sonda ǵana qajetti ári tiimdi reforma jasai alamyz. Osynda otyrǵandardyń bárine aitamyn: «Jańa Qazaqstandy birge quraiyq» degen uran – bos sóz emes. Kásipkerlerdiń, ekonomikadaǵy naqty sektor ókilderiniń bul iske qatysýy óte mańyzdy», - dedi Qasym-Jomart Toqaev.
Prezidenttiń aitýynsha, salyq saiasaty men ony ákimshilendirý isine erekshe nazar aýdarý qajet.
«Bul salada búginde belgili bir teńgerimsizdik baiqalady. Mysaly, keibir iri kompaniialar qoldanysta salyq rejimi boiynsha shaǵyn kásiporyndar deńgeiinde salyq tólep, qýlyǵyn asyryp júr. Naqty kózdelgen yntalandyrý sharalarynyń ornyna tutas biznes toptary men qyzmet túrlerin salyqtan bosatý manipýliatsiia quralyna ainalyp otyr. Biýdjetti qarjydan aiyryp qana qoimai, qoǵamnyń jikke bólinýine ákeletin, ulttyq igilikterdi úlestirýdegi ádildikti tómendetetin qaishylyqtardy retteý joldaryn oilastyrý qajet. Memleket pen biznes bul másele boiynsha bir toqtamǵa kelgennen keiin salyq zańnamasyn turaqtandyryp, kezdeisoq ózgerister tájiribesin toqtatý qajet. Úkimetke biznes-qaýymdastyqpen birlesip, salyq saiasatynyń uzaq merzimdi tujyrymdamasyn ázirleýdi tapsyramyn. Qujatta eldegi salyq salýdyń negizgi tásilderi kórinis tabýǵa tiis. Salyq saiasatynyń negizgi ólshemsharttary turaqty bolýy kerek. Tsifrlandyrý esebinen salyq tóleý protsesterin ońailatýǵa, adami faktordy alyp tastai otyryp, ákimshilendirýge erekshe nazar aýdarý kerek. Bul jumysty búgingi jáne bolashaq ahýalǵa, ulttyq mindetterge súiene otyryp, muqiiat júrgizý kerek. Kelesi jyldyń basynda Úkimetten salmaqty usynystar kútemin», - dedi Memleket basshysy.
