Qazaqstan Prezidenti Qasym-Jomart Toqaev Jambyl oblysynyń ákimi Berdibek Saparbaevty qabyldady, – dep habarlaidy Aqordanyń baspasóz qyzmeti.
Memleket basshysyna óńirdiń 2020 jylǵy damý qorytyndylary men Prezident tapsyrmalarynyń oryndalý barysy, sondai-aq, Qazaqstan halqyna arnalǵan Joldaýdaǵy mindetterdi júzege asyrý jospary jóninde baiandaldy.
Berdibek Saparbaev Qasym-Jomart Toqaevqa esep berilip otyrǵan kezeńdegi Jambyl oblysynyń ekonomikasynyń ósimi 102,2 paiyzǵa, negizgi kapitaldyń investitsiiasy 344,1 milliard teńgege jetkeni jaiynda aitty.
Kezdesý barysynda áleýmettik salany damytýǵa erekshe kóńil bólindi. Prezidentke pandemiia kezinde oblystyń 524 myń turǵynyna 44,6 milliard teńge kóleminde qarjylai áleýmettik kómek kórsetilgeni týraly aityldy. Sondai-aq Táýelsizdik kúni men jańa jyl merekeleri qarsańynda 8 myń adamǵa 203 million teńge kóleminde qosymsha bir rettik kómek berilgen.
Sonymen qatar Qasym-Jomart Toqaevqa Qordai aýdanyndaǵy ahýal jóninde baiandaldy. Oblys ákiminiń aitýynsha, aýdandaǵy jaǵdai turaqty. Byltyr turǵyn úi jáne jol qurylysy, bilim berý, meditsina, mádeniet jáne sport salalary boiynsha jalpy quny 35,1 milliard teńge bolatyn 392 joba iske asyrylǵan. Memleket basshysynyń tapsyrmasy boiynsha 22 eldi mekenge gaz tartý, aýyzsýmen qamtamasyz etý jáne 391 shaqyrym jol salý jumystary júrgizilgen. 360 páterlik 5 turǵyn úi salynǵan.
Berdibek Saparbaev koronavirýstyń kelesi tolqynyna daiyndyq jóninde aitty. Oblysta juqpaly aýrý juqtyrǵandar úshin 4,5 myń jáne jan saqtaý bólimderinde 468 tósek-oryn daiyndalǵan. Dári-dármektiń eki ailyq qory jasaqtalǵan. Qajet bolǵan jaǵdaida qosymsha 7 myńǵa deiin meditsina qyzmetkerleri jumysqa tartylady.
Qordai aýdanynyń Gvardeisk aýylyndaǵy Biologiialyq qaýipsizdik problemalary jónindegi ǵylymi-zertteý institýtynyń bazasynda otandyq immýndyq preparattar shyǵaratyn zaýyttyń qurylysy júrgizilip jatyr.
Berdibek Saparbaev Qasym-Jomart Toqaevqa óńirdegi apatty jaǵdaida turǵan jáne úsh aýysymdy mektepterdiń máselesin sheshý, buqaralyq sportpen shuǵyldanatyn adamdardyń sanyn 35 paiyzǵa deiin jetkizý jospary týraly aqparat berdi.
Memleket basshysy óńirdiń áleýmettik-ekonomikalyq damýy boiynsha oblys ákiminiń jumysyna oń baǵa berip, epidemiialyq ahýaldy baqylaýda ustaýdy, investitsiia tartý jáne Jumyspen qamtý jol kartasyn tiimdi júzege asyrý jumystaryn jandandyrýdy tapsyrdy.
