BUU Adam quqyqtary jónindegi komitetiniń burynǵy múshesi, zań ǵylymdarynyń doktory, professor Marat Sársembaev «Amanat» partiiasynyń keleshegi týraly pikir bildirdi, dep habarlaidy QazAqparat.
«Partiianyń aty ózgerip, rebrending jasap jatqany ózgeristiń basy dep baǵalanýy kerek siiaqty. Partiialyq damýdyń bir kezeńi ótti desek bolady. Endi jańa kezeń kútip tur.
Partiia ári qarai alǵa qalai jyljýy múmkin degenge kelsek, kóp dúnie quramyndaǵy adamdarǵa bailanysty. Onyń ústine bul bilik partiiasy bolyp esepteledi. Partiia quramy qazirgiden de jańarady dep úmittenemiz. Onsyz da osynyń aldyndaǵy sezde aitarlyqtai jańarǵanyn bilemiz. Partiia organynyń basqarý quramyna basqa adamdar kirdi degendei. Burynǵylardyń bir bóligi quramnan shyǵaryldy da. Osy turǵydan alsaq, qandai da bir qozǵalystyń bar ekeni jaqsy. Onyń ishinde kadrlyq turǵydan da, partiia saiasaty turǵysynan da qozǵalys bar dep aita alamyz», - deidi ǵalym.
Zańger Prezident Qasym-Jomart Toqaevtyń 16 naýryzda jariialaityn saiasi reformalardyń jańa baǵdarlamasy «Amanat»-tyń ekinshi tynysyn ashady dep otyr.
«Endi ne bolady desek, bul Prezidenttiń naýryz aiynyń ortasynda eldiń saiasi damý joly týraly ne aitatynyna bailanysty. Memleket basshysy retinde eldiń saiasi damýyn qalai kóretinine, kózqarasy qalai bolatynyna kóp dúnie bailanysty. Osy máselege jaýap alǵan kezde patiianyń qalai jyljityny týraly naqtyraq boljam aitýǵa bolady. Ázirge Prezident osy partiianyń basshysy bolǵandyqtan, «Amanat» partiiasynyń alǵa jasaityn qadamy da sol kezde aitylatyn máselelerge negizdeledi dep oilaimyn.
Prezident osy joly jańa saiasi usynystar aitady dep topshylap otyrmyn. Partiia osy reformalar aiasyndaǵy nusqaýlarmen, sheshimdermen qarýlanyp, ekinshi tynysy ashylady dep oilaimyn», - dedi sarapshy.
