Prezident kótergen «Qaiyrymdy ister» marafony bastamasymen Táýelsizdigimizdiń 30-jyldyq mereili kezeńiniń shymyldyǵyn ashyp otyrmyz. Bul týraly Aqparat jáne qoǵamdyq damý ministri Aida Balaeva málim etti, dep habarlaidy QazAqparat.
«Ystyq qairat. Nurly aqyl. Jyly júrek.
Bul ótken jyldyń sońynda el Prezidenti Qasym-Jomart Kemeluly Toqaevtyń erekshe mán berip, kópshilikke aitqan Uly Abaidyń úsh ulyq sózi. Jái sózder emes, eldi úlken isterge, igi tirlik pen bereke-birlikke shaqyrǵan zor úndeýi. Búgin, mine, barshamyz osy ortada ádeii bas qosyp, osy úndeýdi jalpaq jurtymyzǵa, jany jomart azamattar men júregi keń aǵaiynǵa – jalpy qazaqstandyqtarǵa arnap otyrmyz. Prezidentimiz kótergen osynaý igilikti bastama – «Qaiyrymdy ister» marafonymen Táýelsizdigimizdiń 30 jyldyq mereili kezeńiniń shymyldyǵyn ashyp otyrmyz desek qatelespeimiz», - dedi ministr.
Onyń paiymynsha, qaiyrymdylyq, metsenattyq jáne donorlyq – bizdiń qoǵam úshin eń mańyzdy baǵyttardyń biri.
«Sondyqtan da, Prezidentimiz Táýelsizdiktiń 30 jyldyǵyn keń kólemde atap ótýde halyq birligin arttyryp, eldi uiystyrýǵa arnalǵan izgi jobalarǵa basymdyq berýge shaqyrǵan», - dedi A. Balaeva.
Budan buryn habarlanǵandai, búgin elordada donorlar men metsenattardyń qatysýymen «Qaiyrymdy ister» marafony bastaldy.
Aita keteiik, «Qaiyrymdy ister» marafony bastamasyn Memleket basshysy Qasym-Jomart Toqaev kótergen bolatyn.
.jpeg)