Memleket basshysy Qasym-Jomart Toqaev turǵyn úi máselesin sheshý úshin «5-10-20» baǵdarlamasyn iske qosýdy tapsyrdy, dep habarlaidy QazAqparat.
«Úshinshiden, ekonomikanyń ósimi men jumyspen qamtýdyń jáne áleýmettik qoldaýdyń qýatty stimýly – qoljetimdi turǵyn úi qurylysy bolýy kerek. Elbasy bastaǵan «7-20-25» baǵdarlamasy turǵyn úi qurylysy boiynsha ipotekalyq nesieleýge úlken serpin berdi. Kezekte turǵan adamdardy nesielik turǵyn úimen qamtamasyz etý úshin jańa «5-10-20» baǵdarlamasyn iske qosýdy tapsyramyn», - dedi Prezident tótenshe jaǵdaidy qamtamasyz etý boiynsha memlekettik komissiia otyrysynda.
Bul tapsyrmany oryndaý úshin Memleket basshysy 390 mlrd teńge bólinetinin málim etti.
«Biyl elde rekordyq deńgeidegi – 15 mln sharshy metr nemese 150 myń úi men páter salynady. Azamattarymyzdyń turǵyn úi jaǵdaiyn jaqsartý jumysyn jalǵastyrý kerek. Bul – Úkimettiń strategiialyq baǵyttarynyń biri», - dedi Prezident.
