QR Ádilet vitse-ministri Alma Muqanova Elbasy týraly konstitýtsiialyq zań kúshin joisa da, Prezident týraly konstýtsiialyq zań Elbasyǵa tiiisti kepildikter beretinin aitty, dep habarlaidy QazAqparat.
«Zań shyǵarýshylar burynǵy Prezidentterdi jaýapkershilikten qorǵaityn normany alyp tastaý týraly sheshim shyǵarsa, Nursultan Nazarbaevty jaýapqa tartýǵa bolatynyn aitypsyz. Bul qashan iske asady?» - dep surady BAQ ókilderi ortalyq kommýnikatsiialar qyzmetinde ótken brifingide.
«Keshe Májilistiń keńeitilgen otyrysynan keiin BAQ ókili maǵan osyǵan uqsas suraq qoiǵan bolatyn. Men oǵan Elbasy týraly zańdy joiý týraly usynys bizdiń tujyrymdamamyzda bar ekenin túsindirdim. Eger túzetýler qabyldansa, tiispeýshilik týraly bap Elbasy otbasynyń múshelerine qarastyrylmaityn bolady. Biraq bizde Prezident týraly konstitýtsiialyq zań jobasy bar ekenin eskerýimiz kerek. Onda búkil eks-prezidentterge qatysty normalar bar. Al Elbasy týraly bólek jazylmaǵan. Onda jalpy Prezidentterge ókilettikterin aiaqtaǵannan keiin kepildikter beriletini týraly aitylǵan», - dedi vitse-ministr.
Onyń aitýynsha, Prezident degenimiz – saiasi tulǵa.
«Ol búkil memleketke qatysty ishki jáne syrtqy saiasatpen bailanysty túbegeili sheshimder qabyldaidy. Sondyqtan búkil eks-prezidentterdi qamtityn norma tiisti konstitýtsiialyq zańda bar. Elbasy týraly zań jobasy joiylsa da, bizde Prezident týraly konstitýtsiialyq zań jobasynda tiisti kepildikterdi qamtityn normalar bar», - dedi Alma Muqanova.
