Táýelsizdiktiń otyz jylyn shartty túrde úsh onjyldyq beleske bólip qarastyrýǵa bolady. Qazaqstan Respýblikasynyń Prezidenti Qasym-Jomart Toqaev «Egemen Qazaqstan» gazetindegi «Táýelsizdik bárinen qymbat» atty maqalasynda osylai málimdedi, dep habarlaidy "Ult aqparat".
«Táýelsizdiktiń otyz jylyn shartty túrde úsh onjyldyq beleske bólip qarastyrýǵa bolady. Onyń árqaisysy atqarǵan missiiasy turǵysynan ǵasyrdyń júgin arqalap tur.
Men azattyqtyń alǵashqy onjyldyǵyn jańa Qazaqstannyń irgetasyn qalaý kezeńi dep atar edim. Osy ýaqytta Elbasynyń basshylyǵymen memleketimizdiń nyshandary belgilenip, bilik júiesi qalyptasty. Ulttyq valiýtamyz ainalymǵa endi. Qarýly Kúshterimiz quryldy. Ata zańymyz qabyldandy. Sheteldermen diplomatiialyq qatynas ornatyldy. Elimiz bedeldi halyqaralyq uiymdarǵa múshe boldy», dedi Prezident.
Memleket basshysynyń aitýynsha, «Qazaqstan – 2030» strategiiasyn qabyldanǵan. Shyǵystaǵy kórshimizben shekaramyz bekitilgen.
«Basqa da irgeles memlekettermen shekara jónindegi kelissózder qarqyndy júrgizile bastady. El aýmaǵyn iadrolyq qarýdan tolyq tazarttyq. Elordamyzdy Arqa tósine kóshirdik. Naryqtyq ekonomikaǵa ótip, jekemenshik institýtyn berik ornyqtyrdyq. Otandyq biznestiń negizin qaladyq. Jastar álemniń mańdaialdy oqý oryndarynda bilim ala bastady. Túrli daǵdarystardan aman ótýge múmkindik bergen Ulttyq qorymyz quryldy. Dúnie júzine tarydai shashylǵan qazaq balasyn atajurtqa shaqyryp, Uly kóshke jol ashtyq. Sonyń nátijesinde el eńsesi tiktelip, ulttyq rýhymyz kóterildi», - dedi Prezident.
Memleket basshysy, ekinshi onjyldyq – Qazaq eliniń keregesin keńeitý kezeńi dep atap ótti.
«Osy jyldarda memleketimizdiń tuǵyry nyǵaiyp, ekonomikalyq áleýetimiz arta tústi. Qurlyqtaǵy barlyq shekaramyzdy aiqyndap, zań júzinde bekittik. «Mádeni mura» baǵdarlamasyn júzege asyryp, tarihymyzdy túgendedik. Soltústik Araldy qutqaryp, qashqan teńizdi qaitardyq. Álemdik jáne dástúrli dinder kóshbasshylarynyń sezderin, Eýropadaǵy qaýipsizdik jáne yntymaqtastyq uiymynyń, Aziiadaǵy ózara is-qimyl jáne senim sharalary keńesiniń sammitterin ótkizýge jáne basqa da birqatar mańyzdy halyqaralyq jobalarǵa bastamashy boldyq. Elimizge shetelden qomaqty investitsiia tarttyq. Esildiń jaǵasynda boi kótergen eńseli elordamyz ulttyq ideiamyzǵa ainaldy. «Batys Eýropa – Batys Qytai» halyqaralyq dálizi siiaqty iri infraqurylymdyq jobalar qolǵa alyndy. Turǵyn-úi qurylysy da buryn-sońdy bolmaǵan qarqynmen damydy», - dedi Qasym-Jomart Toqaev.
Memleket basqysynyń aitýynsha, úshinshi onjyldyqta shańyraǵymyz biiktep, ósip-órkendep, mereili memleketke ainaldyq.
«Shekara máselesin birjola sheshtik. «Qazaqstan – 2050» strategiiasyn qabyldap, ozyq damyǵan otyz eldiń qataryna qosylýdy mejeledik.
Ár baǵyt boiynsha «Údemeli indýstriialyq-innovatsiialyq damý», «Nurly jol», «100 naqty qadam» siiaqty aýqymdy baǵdarlamalar júzege asyryldy. Saiasi jáne ekonomikalyq reformalarmen qatar rýhani jańǵyrýǵa basa mán berdik.
Osynaý tolaǵai tabystardyń bárine Elbasynyń dara kóshbasshylyǵynyń hám halqymyzdyń danalyǵy men parasatynyń, birligi men yntymaǵynyń, otandastarymyzdyń qajyrly eńbeginiń arqasynda qol jetkizdik. Sondyqtan, Elbasy Táýelsizdigimizdiń máńgi simvolyna ainaldy desek, aqiqatty aitqan bolar edik», - dedi Prezident.
Qasym-Jomart Toqaev kelesi onjyldyqtyń mindetin atap ótti.
«Aldaǵy tórtinshi onjyldyqtyń bizge júkteitin mindeti – qýatty eldiń iesi jáne kemel halyq bolý. Bul jolda saiasi-ekonomikalyq reformalardy jáne sanany jańǵyrtý úderisin jalǵastyryp, zaman talabyna beiimdelgen ulttyń jańa bolmysyn qalyptastyrýymyz qajet.
Biz ádiletti qoǵam men tiimdi memleket qurýdy kózdep otyrmyz. Kez-kelgen iste ádildik qaǵidatyn basshylyqqa alsaq, buǵan anyq qol jetkizemiz. Mysaly, turǵyndardyń turmysyn jaqsarta túspesek, elimizdiń jetistikteri men halyqaralyq tabystaryn maqtan etý artyq. Azamattarymyz ekonomikalyq ósimniń igiligin sezine almasa, odan esh qaiyr joq. Men árbir sheshimdi qabyldar sátte osy ustanymdy basshylyqqa alamyn. Biz halyqtyń áleýmettik jaǵdaiyn jaqsartýmen qatar, barlyq azamattardyń múddesin birdei qorǵaimyz. Meniń uǵymymdaǵy ádiletti memleket degenimiz – osy.
Tarihqa kóz júgirtsek, ár býyn belgili bir synaqty basynan ótkeredi. Bizdiń babalarymyz «Aqtaban shubyryndy, Alqakól sulamany», atalarymyz alapat asharshylyqty, qýǵyn-súrgindi, dúniejúzilik soǵysty kórdi.
Totalitarlyq kezeńde ulttyq qundylyqtarymyzdan, tilimizden, dilimiz ben dinimizden aiyrylyp qala jazdadyq. Onyń bári Táýelsizdiktiń arqasynda halqymyzǵa qaita oraldy. Biraq, ult pen el retinde saqtalyp qalý úshin búgingi jáne bolashaq urpaq jańa syn-qaterlerge daiyn bolýy kerek», - dedi Prezident.
Onyń aitýynsha, qazirgi pandemiia jáne sonyń saldarynan týyndaǵan daǵdarys búkil álemniń buryn bolmaǵan jańa synaqtarmen betpe-bet kelip otyrǵanyn anyq kórsetken.
«Ekonomikalyq, áleýmettik, ekologiialyq, biologiialyq jáne basqa da qaterlerge qosa, jer júzine jaǵymsyz ideologiialyq virýstar da jaiylyp keledi. Jahandaný kezinde el jat jurttyń yqpalyna beisanaly túrde ilesip ketkenin ańǵarmaidy. Basqasha aitqanda, májbúrlikten emes, sanasynyń ýlanýy arqyly óz erkimen torǵa túsedi. Sondyqtan, jańa zamannyń jaqsy-jamanyn ekshep, artyqshylyqtaryn boiǵa sińirýmen qatar, tamyrymyzdy berik saqtaýymyz qajet. Ulttyq bolmysymyzdan, tól mádenietimiz ben salt-dástúrimizden ajyrap qalmaý – barlyq órkenietter midai aralasqan alasapyranda jutylyp ketpeýdiń birden bir kepili», - dedi Memleket basshysy.
.jpeg)