QR Táýelsizdiginiń 30 jyldyǵyna arnalǵan saltanatty jiynda Prezident Qasym-Jomart Toqaev Táýelsizdiktiń tórtinshi onjyldyǵy qandai mindetter júkteitinin aitty, dep habarlaidy QazAqparat.
«Tarihi ýaqyt ólshemimen qaraǵanda 30 jyl degen – qas-qaǵym sát. Al, ótken oqiǵalar turǵysynan baǵalasaq, ǵasyrlarǵa tatityn merzim. Qazaqstan halqy úshin bul – azattyq jylnamasynyń tutas dáýiri. Jarqyn bolashaǵymyzǵa jol salǵan uly jetistikter kezeńi.
Endi Táýelsizdiktiń tórtinshi onjyldyǵyna qadam basqaly turmyz. Bul kezeń bizge jańa mindetter júkteidi. Memlekettigimizdi odan ári nyǵaityp, halqymyzdyń ál-aýqatyn arttyra túsýimiz kerek. Sondyqtan, barlyq saladaǵy reformany jalǵastyra beremiz», - dedi Prezident.
Sondai-aq, Qasym-Jomart Toqaev endigi býynnyń mindeti Táýelsizdikti qorǵap, nyǵaitý ekenin eske saldy.
«Eń bastysy, beibit ómirdi, tynyshtyq pen turaqtylyqty saqtai bilýimiz qajet. Sonda azamattarymyz Táýelsizdiktiń igiligin árdaiym sezinetin bolady. Bizdiń maqsatymyz – osy.
Babalarymyz ǵasyrlar boiy Táýelsizdikke jetý úshin kúresse, endigi urpaq Táýelsizdikti qorǵap, nyǵaitý úshin kúresedi. Biz búgingi eldik isterdi jastarǵa amanattaimyz.
Qazirgi aýqymdy jumystyń bári jarqyn bolashaq úshin jasalýda. Egemendik kezeńinde oiy azat, rýhy biik Táýelsizdik perzentteri ósip-jetildi. Shyn máninde, olardyń áleýeti óte zor, múmkindikteri orasan. Óskeleń urpaq aǵa býynnyń tájiribesin paidalanyp, úmitin aqtaidy dep senemin», - dedi Memleket basshysy.
