Foto: Aqorda
Prezident Respýblika kúnine arnalǵan saltanatty jiynda sóz sóiledi. Bul týraly Aqorda málim etti.
— Bul kúndi halqymyzdyń derbes el bolýyna jol ashqan qasterli kún deýge bolady» «Elimizdiń eń basty merekesi — Respýblika kúni qutty bolsyn! Ulttyq meiram qarsańynda dástúrge sai Aqorda tórinde memleketimizdiń úzdik azamattarymen birge jinalyp otyrmyz. Biyl elimiz azattyqtyń mereili belesine jetti. Osydan 35 jyl buryn Qazaqstannyń Egemendigi týraly deklaratsiia qabyldandy. Dál osy kúni san ǵasyrlyq memlekettilik dástúrimiz qaita jańǵyrdy. Kóp uzamai jurtymyz Táýelsizdik bairaǵyn kóterdi. Tarihi ádildik ornap, ulttyń rýhy asqaqtady. Sondyqtan bul kúndi halqymyzdyń derbes el bolýyna jol ashqan qasterli kún deýge bolady. Táýelsizdik — bárinen qymbat qundylyǵymyz. Ony saqtap, nyǵaita túsý — barshamyzǵa ortaq qasietti borysh. Egemendik — ata-babalarymyzdyń ult múddesi jolyndaǵy óshpes erliginiń aiqyn kórinisi, — dedi Qasym-Jomart Toqaev.
Memleket basshysy «Biz ótkennen sabaq alyp, eshkimge jaltaqtamai, óz jolymyzben júrip kelemiz» dedi.
— Zańǵar oishyl Ábish Kekilbaev „Ótkennen taǵylym, erteńnen úmit izdegender ǵana ilgeri basa alady“ degen. Biz ár kezeńde ult tarihynda óshpes iz qaldyrǵan barlyq memleket jáne qoǵam qairatkerlerine qurmet kórsetemiz, olardy eshqashan umytpaimyz. Sonymen birge keleshekke úlken úmitpen, zor senimmen qaraimyz, biik maqsattarǵa umtylamyz. Osy jyldarda elimizdiń baǵyndyrǵan belesteri az emes. Biz jer júzine egemen memleket retinde tanyldyq. Shekaramyzdy shegendep, irgemizdi bekitip, qaýipsizdigimizdi qamtamasyz ettik. Birligimizdi bekemdep, tatýlyq pen turaqtylyqtyń arqasynda túrli synaqtardan súrinbei óttik. Búginde jahan jurty elimizdiń ósip-órkendep kele jatqanyna kýá bolyp, óz qurmetin kórsetýde. Alaida kemshiliksiz, minsiz jumys bolmaityny anyq. Biz ótkennen sabaq alyp, eshkimge jaltaqtamai, óz jolymyzben júrip kelemiz. Sońǵy jyldary halyqtyń ál-aýqatyn arttyrý úshin asa mańyzdy qadamdar jasaldy. 2019 jyly aýqymdy reformalar qolǵa alyndy. Qazaqstan jańa turpatty el bolý jolyna tústi. Jalpyhalyqtyq referendým arqyly Ata zańymyzǵa túzetýler engizildi. Parlamenttiń quzyreti keńeidi, Úkimettiń jaýapkershiligi artty. Konstitýtsiialyq sot quryldy. Adam quqyqtary jónindegi ýákil institýty konstitýtsiialyq mártebege ie boldy. Biyl shilde aiynan bastap Kassatsiialyq sot júiesi iske qosyldy, bul qoǵamymyzda ádilettilikti kúsheitýge jaǵdai jasady, — dedi Prezident.
