Qazaqstanda endi kólik júrgizýshileri ózimen birge kóp qujat alyp júrmeitin boldy. Ishki ister ministrligi júrgizýshiler úshin qaǵaz qujattardyń sanyn qysqartý máselelesin pysyqtap qoidy, dep habarlaidy "Ult aqparat".
Qaǵaz qujattardy elektrondy formatqa kóshirý Qazaqstandy tsifrlandyrý baǵdarlamasy aiasyndaǵy basty mindetterdiń biri bolyp tabylady. Tolyp jatqan qujattardy ózińmen birge alyp júrýdi doǵarý avtokólik ieleri úshin de ózekti másele bolyp otyr. Bul usynys Ulttyq qoǵamdyq senim keńesiniń ekinshi otyrysynda Memleket basshysynyń áleýmettik-ekonomikalyq reformalar paketine engenin aitqan.
Belgili bolǵandai, qazirgi tańda Ishki ister ministrligi júrgizýshiler úshin qaǵaz qujattardyń sanyn qysqartý máselelesin pysyqtap qoidy. Osyǵan qatysty ereje Parlament Májilisiniń depýtattary bastama etken jol qozǵalysy máselelerine qatysty zańnamaǵa engizildi. Budan bylai avtokólikti teksergen jaǵdaida tártip saqshysyna tek jeke basyn kýálandyratyn qujatty usynsa jetkilikti. Al kólik iesi týraly ózge derekterdiń barlyǵyn, senimhattyń kimge jazylǵany, saqtandyrý polisi men tehnikalyq baiqaýdyń merzimderi týraly JPQ inspektorlary planshetten jáne júiege kirý arqyly kóre alady.
Aita ketsek, Ulttyq qoǵamdyq senim keńesiniń ekinshi otyrysynda sóz alǵan elimizdiń Prezidenti atalǵan máseleni sheshý jóninde úkimetke tapsyrma bergen bolatyn.
«Bizde áli kúnge deiin qai jerde bolmesyn eń aldymen qaǵaz qujattardy talap etedi. Mysaly, júrgizýshilerdiń barlyǵy tehnikalyq qujat, jeke kýálik, saqtandyrý qujaty, taǵysyn taǵylaryn ózimen birge alyp júredi. Olardy úiinde umytyp ketkeni úshin jazalanady. Úkimet osy máseleni sheshýge mindetti», – dep atap ótti Qasym-Jomart Toqaev.
QR tsifrlyq damý, innovatsiialar jáne aeroǵarysh ónerkásibi ministri
Baǵdat Mýsin «avtokólikti tizgindeýge quqyly ekenińdi dáleldeý úshin ózińmen birge bir býma qujatty alyp júrý – ótken dáýirdiń kórinisi» dep málimdedi. Osyǵan bailanysty Tsifrlyq damý ministrligi qujattardy ǵana emes, protsesterdi de avtomattandyrýdy maqsat etip otyr.
Kelip túsken usynystarǵa sáikes, avtokólik júrgizýshisiniń ózimen birge quqyq belgileitin barlyq qujattardy alyp júrýin mindettemeitin ereje engizý kózdelýde. Tek jeke kýálik bolsa bolǵany. JPQ qyzmetkerleri sol boiynsha planshetten azamattyń atyna qandai kólik tirkelgeni, saqtandyrý polisiniń merziminiń qashan aiaqtalatyny, tehnikalyq baiqaýdan ótken kúni men aiyppuldyń bar-joǵy sekildi derekterdi tolyqtai kóre alady. Sonymen qatar politseilerdiń qyzmettik planshetterin kóshedegi beinekameralarmen kiriktirý josparda bar.
Jalpy aitqanda elimizdiń kólik naryǵy týraly sóz etetin bolsaq, Sońǵy málimetter, iaǵni 2020 jylǵy 1 qazandaǵy jaǵdai boiynsha el aýmaǵynda 3,8 mln birlik jeńil kólik tirkelgen. 2020 jylǵy qańtar-qyrkúiekte 561,8 myń birlik jeńil avtokólik tirkeýge qoiylǵan eken. Bul ótken jyldyń dál osy kezeńimen salystyrǵanda 13,1%-ke kem. Sonymen qatar, shyqqan jyly boiynsha tirkelgen jeńil kólikterdiń jalpy sanynda zaýyttan shyqqanyna 10 jyldan asqan kólikterdiń sany basym (64,9%). Shyqqanyna 3 jyldan aspaǵan jeńil kólikter tirkelgen jeńil kólikterdiń jalpy sanynyń 11,5%-in, shyqqanyna 3 jyldan 7 jyl aralyǵyndaǵylar – 15%, 7 jyldan 10 jyl aralyǵyndaǵylar – 6,7%-ti quraidy.
