Aqtóbe oblysy boiynsha biyl orman alqabyna 2 million túp ekpe egiledi. Qazir ormanshylar jumystyń teń jartysyn eńserdi, dep habarlaidy "Ult aqparat".
Aqtóbe oblysy boiynsha barlyǵy 7 orman sharýashylyǵy bar. Qazirgi kezde ormanshylar tálimbaqta baptalǵan ekpeni ege bastady.
«Tuqym egilip, tálimbaqta baptalady. Standarttyq úlgige jetken kezde orman alqabyna otyrǵyzylady. Keibir ekpe bir jylda, keibiri 2-3 jylda ósip-ónedi. Tamyry tereń, sabaǵynyń diametri 3 mm, biiktigi 15-40 sm bolýy tiis. Aldaǵy bes jylda 10 túrin egemiz. Olar: qaraǵai, terek, qaiyń, shaǵan, shegirshin, qaraqat, jide, qara sekseýil, orman almasy, úieńki», - dedi oblystyq tabiǵi resýrstar jáne tabiǵatty paidalanýdy retteý basqarmasy orman sharýashylyǵy bóliminiń basshysy Ǵabit Qylyshbaev. Osy jolmen jyl saiyn 500-600 gektar jerdi ormanmen kómkerilgen alqapqa ainaldyrý kózdelgen. Jospar boiynsha biyl barlyǵy 1 myńnan gektardan astam alqapqa 2 mln túp jasyl óskin otyrǵyzylady. Al bes jyldyq meje - 60 mln túp ekpe.
«Jospardyń teń jartysy oryndaldy. Aýa raiyn bailanysty keibir aýdan jumysty bastai almai otyr. Bes jyl boiy kútim jasap, keiin orman alqabynyń esebine alamyz. Negizi ekken óskin sýarylmaidy. Tabiǵi jolmen ósýi tiis. Osylai biz 2022-2023 jyldary jyl saiyn 7 myń ga alqapqa ekpe egemiz», - dedi Ǵabit Qylyshbaev.
