Foto: Abai oblysy ákimdigi
Alakólde demalys maýsymynyń qyzǵan shaǵynda týristik infraqurylym men qaýipsizdik máselesine qatysty shuǵyl jiyn ótti. Bul — Memleket basshysy Qasym-Jomart Toqaevtyń Alakóldegi qyzmet sapasyna bailanysty synynan keiin qolǵa alynǵan alǵashqy naqty sharalardyń biri, dep habarlaidy Ult.kz.
Oblys ákiminiń tapsyrmasymen oblys ákiminiń orynbasary Serik Tólenbergenov Alakólge baryp, tiisti mekemelermen jedel keńes ótkizdi.
Jiynda ne aityldy?
-
Týrister úshin qolaily orta qalyptastyrý,
-
sanitarlyq tazalyq pen jaǵalaýdaǵy tártip,
-
qoǵamdyq qaýipsizdik pen qyzmet sapasy keńinen talqylandy.
Jiyn qorytyndysy boiynsha:
-
quqyq qorǵaý organdarymen birlesken reidter kúsheitiledi;
-
motorly qaiyq ieleriniń qaýipsizdik talaptaryn saqtaýyna baqylaý artady;
-
qoqys tastaǵan saýda oryndary men demalys núktelerine aiyppul salynady.
2018 jyldan beri jóndeý kórmegen jaǵalaýǵa biyl erekshe kóńil bólindi.
Oblys ákimi Berik Ýáli kóktemnen beri Alakólge úsh ret baryp, kóshpeli jiyn ótkizdi. Nátijesinde 658 mln teńge bólinip, jaǵajaidy jaqsartýǵa naqty jumystar bastaldy.
Qarjy mynadai jobalarǵa baǵyttaldy:
-
Arbat alańyn jóndeýge – 108,9 mln teńge
-
Qoǵamdyq keńistik qurýǵa – 171,6 mln teńge
-
Jaǵalaýdy abattandyrýǵa – 107,5 mln teńge
-
25 kiim aýystyratyn oryn, 50 konteiner, 2 biotýalet, 3 pirs, qutqarý munaralary men jaryqtandyrý ornatyldy.
Qaýipsizdik baǵytynda jańa nysandar salynyp jatyr
Alakól jaǵalaýynda qutqarý stantsiiasynyń qurylysy bastaldy. Ol tótenshe jaǵdailardyń aldyn alyp, alǵashqy meditsinalyq kómek kórsetetin jáne qaýipsizdikti arttyratyn keshen retinde jumys istemek.
Sonymen qatar, Qabanbai aýylynda órt sóndirý deposy salynyp jatyr. Bul nysan Alakól mańyndaǵy órt qaýipsizdigin qamtamasyz etetin bolady.
Eske salaiyq, Prezident Alakóldegi týrizm sapasy tómen ekenin aityp, Úkimetke eskertý jasaǵan edi.
