"Lashyn Qus" esimimen tanylǵan Aqgúl Ásetqyzy 2027 jyly Qazaqstandaǵy birqatar tanymal tulǵanyń shynaiy bolmysy áshkere bolýy múmkin ekenin aitty. Ózin kóripkel retinde tanystyratyn ol jýrnalist Janar Baisemizge bergen suhbatynda el aldynda júrgen adamdarǵa qatysty tosyn boljamyn jariialady, dep habarlaidy ult.kz.
Suhbat barysynda Aqgúl Ásetqyzy aldaǵy jyly ózgelerge qiianat jasaǵan adamdardyń áreketi ózderine keri áser etýi múmkin ekenin málimdedi. Onyń sózinshe, ásirese dýa jasaýmen jáne jasatýmen ainalysatyndar úshin 2027 jyl ońai bolmaýy yqtimal.
"2027 jyly dýa jasaýshy bolsyn, dýa jasatýshylar bolsyn, naǵyz qarymtasy, qaitarymy qaitatyn kez kele jatyr. Sol úshin abai bolyńyzdar. Nege? Sebebi karma qaitatyn kez", – dedi ol.
"Kóp adamnyń betperdesi sheshiledi"
Aqgúl Ásetqyzynyń málimdeýinshe, aldaǵy jyly halyq arasynda bedeli joǵary, kópshiliktiń senimine ie bolǵan belgili adamdarǵa qatysty kútpegen aqparattar jariialanýy múmkin. Ol Qazaqstandaǵy tanymal tulǵalardyń biriniń dýa jasatýǵa qatysy bar degen boljamyn da ortaǵa saldy. Alaida naqty esimin ataǵan joq.
Jýrnalist Janar Baisemiz odan sóz bolyp otyrǵan adamnyń bilikke qatysy bar-joǵyn surady.
"Barlyq nársege qatysy bar", – dep qysqa jaýap qaiyrdy Aqgúl Ásetqyzy.
Ózin kóripkel retinde tanystyratyn áiel bul adamnyń kim ekenin ashyp aitýdan bas tartty. Ol mundai málimdemeniń sot daýyna ulasýy múmkin ekenin alǵa tartqan.
Sonymen qatar Aqgúl Ásetqyzy qoǵam aldynda halyqtyń qamyn oilaityn tulǵa retinde kórinetin keibir adamdardyń jasyryn áreketteri belgili bolady dep boljady.
"Biraq 2027 jyly "Biz elge kómektesemiz", "Halqym meniń", "El úshin" dep júrgen kóp adamnyń betperdesi sypyrylyp sheshiledi", – dedi ol.
"Árqaisysynyń jeke kóripkeli bar"
Suhbat barysynda Aqgúl Ásetqyzy elge tanymal adamdardyń arasynda tylsym kúshke senip, kóripkelderdiń kómegine júginetinder bar ekenin de aitty.
"Bilesiz be, siz tańǵalasyz qazir. Qazir kóp el aldynda jyltyrap júrgen adamdardyń árqaisysynda jeke kóripkeli, jeke energiia tartýshy, energiia jaratýshy adamdary bar", – dedi ol.
Alaida Aqgúl Ásetqyzy sóz etken adamdardyń kim ekenine qatysty naqty málimet nemese onyń boljamdaryn rastaityn dálel usynbady.
Aita keteiik, bul pikirler ǵylymi negizdelgen boljam nemese dáleldengen derek emes, suhbat qonaǵynyń jeke paiymy retinde qarastyrylýy tiis.
Buǵan deiin de "Lashyn Qus" Kaspiide qaza tapqan sarbazdarǵa qatysty málimdeme jasaǵan. Ol qaiǵyly oqiǵany aldyn ala boljaǵanyn jáne marqumdarmen tylsym bailanys ornatqanyn aitqan. Alaida bul sózderdi rastaityn táýelsiz dálelder keltirilmegen.
