27 qazanda Qazaqstannyń birqatar óńirinde qolaisyz meteorologiialyq qubylystar boljanady, dep habarlaidy ult.kz.
Kei jerlerde tuman túsip, úsik júredi, jel kúsheiip, shańdy daýyl soǵýy múmkin. Sonymen qatar birneshe oblysta joǵary jáne tótenshe órt qaýpi saqtalady.
Pavlodar oblysynyń batysy men ońtústiginde azdaǵan jańbyr men qar jaýyp, kóktaiǵaq bolýy yqtimal. Oblystyń batysynda, soltústiginde jáne ortalyǵynda, sondai-aq Pavlodar qalasynda tuman kútiledi.
Almaty oblysynyń taýly aýdandarynda soltústik-shyǵystan soqqan jeldiń ekpini sekýndyna 15-20 metrge jetedi. Túnde oblys boiynsha 1-6 gradýs úsik júredi. Almaty qalasynda aýa temperatýrasy túnde 1-3 gradýsqa deiin, Qonaev qalasynda 2-4 gradýsqa deiin tómendeidi. Óńirdiń batysynda, ońtústiginde jáne shyǵysynda joǵary órt qaýpi boljanady.
Jetisý oblysynyń taýly aýdandarynda túnde jáne tańerteń tuman túsedi. Alakól kólderi aýdanynda jeldiń ekpini sekýndyna 15-20 metrge, kei ýaqyttarda 23-28 metrge deiin jetýi múmkin. Túnde oblys boiynsha 2-7 gradýs, ortalyǵynda 11 gradýs úsik kútiledi. Óńirdiń shyǵysynda tótenshe, ońtústiginde joǵary órt qaýpi saqtalady.
Qyzylorda oblysynyń shyǵysy men ortalyǵynda kúndiz shańdy daýyl soǵýy múmkin. Soltústik-shyǵystan soqqan jeldiń ekpini sekýndyna 15-20 metrge jetedi. Túnde oblystyń soltústigi men ortalyǵynda 3 gradýs úsik kútiledi. Óńirde tótenshe, soltústiginde joǵary órt qaýpi saqtalady. Qyzylorda qalasynda da kúndiz shańdy daýyl soǵyp, jeldiń ekpini sekýndyna 15-20 metrge deiin kúsheiýi yqtimal.
Túrkistan oblysynyń taýly jáne taý bókterindegi aýdandarynda soltústik-shyǵystan soqqan jeldiń ekpini sekýndyna 15-20 metrge jetedi. Túnde oblystyń soltústigi men batysynda 3 gradýs úsik kútiledi. Óńirdiń soltústiginde, batysynda, ortalyǵynda jáne taý bókterindegi aýdandarynda, sondai-aq Shymkent pen Túrkistan qalalarynda joǵary órt qaýpi saqtalady.
Jambyl oblysynyń taýly aýdandarynda tuman túsip, jeldiń ekpini sekýndyna 15-20 metrge deiin kúsheiedi. Túnde oblys boiynsha 3-8 gradýs úsik boljanady. Taraz qalasynda aýa temperatýrasy 5-7 gradýsqa deiin tómendeýi múmkin. Oblystyń soltústiginde, ońtústiginde jáne shyǵysynda joǵary órt qaýpi saqtalady.
Mańǵystaý oblysynyń ortalyǵynda shyǵystan soqqan jeldiń ekpini sekýndyna 15-20 metrge jetedi. Oblys boiynsha joǵary, ortalyǵynda tótenshe órt qaýpi saqtalady. Aqtaý qalasynda da joǵary órt qaýpi bar.
Aqtóbe oblysynyń soltústiginde túnde jáne tańerteń tuman kútiledi. Óńirdiń shyǵysynda joǵary, al batysynda, ońtústiginde jáne ortalyǵynda tótenshe órt qaýpi saqtalady. Batys Qazaqstan oblysynyń soltústik-batysynda, batysynda, ońtústiginde jáne shyǵysynda joǵary órt qaýpi boljanady.
Atyraý oblysynda, onyń ishinde Atyraý qalasynda tótenshe órt qaýpi saqtalady.
Soltústik Qazaqstan oblysynyń batysynda, soltústiginde jáne ońtústiginde tuman kútiledi. Petropavl qalasynda túnde jáne tańerteń tuman túsýi múmkin. Qostanai oblysynyń soltústigi men shyǵysynda da túnde jáne tańerteń tuman boljanady. Oblystyń ońtústiginde joǵary órt qaýpi saqtalady.
Aqmola oblysynyń soltústiginde, shyǵysynda jáne ońtústiginde túnde jáne tańerteń tuman túsedi. Astana qalasynda da osy ýaqyt aralyǵynda tuman kútiledi.
Qaraǵandy oblysynyń soltústigi men shyǵysynda túnde jáne tańerteń tuman boljanady. Oblystyń batysynda tótenshe órt qaýpi saqtalady. Ulytaý oblysynyń batysy men ortalyǵynda, sondai-aq Jezqazǵan qalasynda tótenshe órt qaýpi kútiledi.
