Memleket basshysynyń tapsyrmasy boiynsha, búgin Almaty qalasynda Qazaqstan Respýblikasynyń Memlekettik hatshysy G.Ábdiqalyqova belgili mádeniet jáne óner qairatkerlerine Qazaqstan Respýblikasynyń Tuńǵysh Prezidenti – Elbasynyń mádeniet salasyndaǵy 2016 jylǵy memlekettik stipendiiasyn tabys etti, dep habarlaidy "Ult aqparat" Aqordaǵa silteme jasap.
Stipendiialar jyl saiyn Qazaqstan Respýblikasynyń qurmetti ataqtary men memlekettik marapattaryna ie bolǵan shyǵarmashylyq ókilderi men mádeniet qairatkerlerine, sondai-aq Qazaqstannyń mádenietin qalyptastyrýǵa, saqtaýǵa jáne damytýǵa qosqan úlesi úshin airyqsha daryndy shyǵarmashyl jastarǵa memlekettik qoldaý kórsetý maqsatymen beriledi.
Gúlshara Ábdiqalyqova saltanatty rásimge qatysýshylardy quttyqtap, olarǵa memlekettik stipendiianyń tapsyrylýy Qazaqstan mádenietin damytýǵa qosqan eleýli úlesterine berilgen baǵa ekenin aitty.
Memlekettik hatshy 2016 jyldyń basty oqiǵasy – Qazaqstan Respýblikasynyń 25 jyldyǵyn merekeleý bolǵanyn atap ótti. G.Ábdiqalyqova Qazaqstan Prezidentiniń Jarlyǵymen bekitilgen «Birlik pen jasampazdyqtyń 25 jyly» atty Táýelsizdiktiń 25 jyldyǵyn merekeleý tujyrymdamasy aiasynda merekelik is-sharalar ótkizilgenine toqtaldy. Jalpy, Táýelsizdik mereitoiyn merekeleý jónindegi is-sharalar arqyly memlekettilikti jáne halyqtyń birligin odan ári nyǵaitýǵa, qazaqstandyqtardy «Máńgilik El» jalpyulttyq ideiasy tóńiregine toptastyrýǵa negizdelgen basty maqsattarǵa qol jetkizildi.
Otandyq mádenietti damytýǵa qosqan úlesi úshin ádebiet pen ónerdiń 75 qairatkerine memlekettik stipendiia taǵaiyndaldy. Stipendiiaǵa ie bolǵandar qatarynda Asanáli Áshimov, Myrzatai Joldasbekov, Sábit Dosanov, Bibigúl Tólegenova, Vladimir Tolokonnikov jáne taǵy basqa maitalmandar bar.
Sonymen birge Erlan Júnis, Mádina Baspaeva, Tasqyn Jarmuhamed, Dimash Qudaibergenov jáne ózge de jas daryndarǵa memlekettik qoldaý kórsetildi.
Memlekettik hatshy kezdesý barysynda 2017 jyly Qazaqstan Respýblikasynyń Memlekettik rámizderi – Tý men Eltańbanyń qabyldanǵanyna 25 jyl tolatynyn atap ótti. Sondai-aq, ózge de mańyzdy oqiǵalar qataryna elimizdiń BUU Qaýipsizdik Keńesinde turaqty emes músheligi, Astana «EHRO-2017» halyqaralyq mamandandyrylǵan kórmesi, Dúniejúzilik qysqy ýniversiada kiredi.
Kezdesý sońynda G.Ábdiqalyqova shyǵarmashyl ziialy qaýym ókilderiniń «Máńgilik El» jalpyulttyq qundylyqtaryn ilgeriletýge, Qazaqstan mádenietin odan ári damytýǵa eleýli úles qosa beretinderine senim bildirdi.
.jpeg)