Qazaqstandyq MMA jaýyngeri Erkebulan Toqtar taekvondoshy Tamirlan Tileýlesti Aziia oiyndaryndaǵy tarihi jeńisimen quttyqtap, oǵan baiǵazy berdi, dep habarlaidy ult.kz.
Sportshy áleýmettik jelidegi paraqshasynda Tamirlanmen kezdesken sátinen video jariialady. Kezdesý kezinde jas chempion altyn medalin kórsetken. Al Erkebulan Toqtar onyń jetistigine qýanyp, qazaqy dástúrmen 100 AQSh dollaryn baiǵazy retinde tabystaǵan.
Tamirlan Tileýles 2026 jylǵy Aziia oiyndarynda 58 kelige deiingi salmaq dárejesinde óner kórsetip, birneshe qarsylasyn jeńgen. Ol jarys barysynda Oman, Iran jáne Ońtústik Koreia sportshylarynan basym túsken.
Al sheshýshi kezdesýde Filippin ókili Kýrt Braian Barbosamen kúsh synasyp, 2:0 esebimen jeńiske jetken.
Osylaisha, Tamirlan Tileýles Qazaqstan tarihynda jazǵy Aziia oiyndarynyń taekvondo jarysynan altyn medal jeńip alǵan alǵashqy sportshy atandy.
Jas chempionnyń jetistigin Erkebulan Toqtar da nazardan tys qaldyrmai, oǵan qurmet kórsetip, aqshalai syilyq bergen.
Erkebulan Toqtar kim?
Erkebulan Toqtar – qazaqstandyq akter, aralas jekpe-jek (MMA) sportshysy jáne bloger. Ol kino salasyndaǵy rólderimen jáne jekpe-jek alańyndaǵy ónerimen kópshilikke tanylǵan. Sportshy áleýmettik jelilerde belsendi bolyp, jattyǵýlary men jarystarynan beinejazbalar jariialap turady. Erkebulan akterlik óner men kásibi sportty qatar alyp júrgen qazaqstandyq tanymal tulǵalardyń biri.
Erkebulan Erboluly Toqtar 1995 jyly 29 jeltoqsanda Almaty qalasynda dúniege kelgen. Ol Almaty energetika jáne bailanys ýniversitetinde aqparattyq tehnologiialar mamandyǵy boiynsha bilim alǵan. Keiin E. A. Bóketov atyndaǵy Qaraǵandy memlekettik ýniversitetiniń zań fakýltetin támamdaǵan. Akterlik sheberlikti arnaiy kýrstarda meńgerip, kaskaderlik daiyndyqtan ótken. 2011 jyldan bastap kino túsirilimderine qatysyp, alǵashqyda shaǵyn rólderdi somdaǵan. 2017 jyly “ZOR” filminde alǵash ret basty rólge ie boldy. Keiin “Zamandastar”, “Kókjal”, “Bisharashki” jáne “Ómir súrýdi úiret” jobalaryna tústi. 2025 jyly “Arlan” sporttyq dramasynda basty keiipkerdi somdady. Erkebulan 2021 jyldan bastap kásibi aralas jekpe-jek jarystaryna qatysa bastaǵan. Ol OCTAGON ligasynda óner kórsetip, sport jankúierleriniń nazaryn aýdardy. Jekpe-jek áleminde “Akter” laqap atymen tanymal. 2025 jyly OCTAGON uiymynyń BMF belbeýin jeńip aldy. Sonymen qatar áleýmettik jelilerde sporttyq daiyndyǵy men shyǵarmashylyǵyna qatysty jazbalar jariialap keledi.
