Foto: Akorda.kz
Prezident Qazaqstanǵa resmi saparmen kelgen Shveitsariianyń federaldy keńesshisi, Syrtqy ister ministri Iniatsio Kassispen kezdesý ótkizdi, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaev eki el arasyndaǵy tyǵyz qarym-qatynas dostyq pen yntymaqtastyq rýhynda damyp kele jatqanyn atap ótti.
Memleket basshysy Shveitsariianyń Almatydaǵy Qurmetti konsýldyǵy qyzmetiniń bastalýymen quttyqtady. Onyń resmi ashylý rásimine Iniatsio Kassis qatysty.
Prezident Shveitsariia Qazaqstannyń Eýropadaǵy negizgi saiasi, saýda jáne ekonomikalyq seriktesteriniń biri ekenin aitty. Qazirgi ýaqytta Shveitsariia Qazaqstannyń jetekshi 20 saýda seriktesiniń qataryna kiredi. Elimizge jalpy kólemi 32,5 milliard dollardan astam investitsiia quiǵan úsh iri investordyń biri.
– Biz Qazaqstan ekonomikasynyń perspektivti salalaryna investitsiia quiýǵa daiyn jańa shveitsariialyq kompaniialardy qoldaimyz. Qazaqstan Úkimeti men Stadler temirjol kontserni arasynda qol qoiylǵan kelisimniń keleshegi zor dep oilaimyn. Sondyqtan osy mámileniń júzege asyrylý barysyn erekshe qadaǵalaimyz. Bul bizdiń qarym-qatynasymyzdyń damýyna tyń serpin beredi, – dedi Qasym-Jomart Toqaev.
Memleket basshysy Shveitsariia Konfederatsiiasynyń Prezidenti Alen Bersege izgi tilegin joldady.
Iniatsio Kassis ekijaqty yntymaqtastyqtyń qazirgi damý deńgeiine oń baǵa berip, ony nyǵaitý isine atsalysýǵa daiyn ekenin jetkizdi. Shveitsariianyń Syrtqy ister ministri elimizde júrgizilip jatqan aýqymdy reformalardy joǵary baǵalady.
– Ekijaqty saýda men investitsiia tyǵyz bailanystarymyzdyń mańyzdy baǵyty sanalady. Ózińiz aitqandai, eger Shveitsariianyń jeke kompaniialary sizdiń elińizge investitsiia quisa, bul reformalaryńyzdyń tabysty júzege asýyna, sondai-aq qarjy salý úshin jasalatyn jaǵdaidyń jaqsarýyna yqpal etedi, – dedi ministr.
Áńgimelesý barysynda óńdeý ónerkásibi, saýda jáne logistika, mashina jasaý, aýyl sharýashylyǵy, qarjy qyzmetteri, tsifrlandyrý, bilim berý salalarynda birlesken investitsiialyq jobalardy iske asyrýǵa erekshe nazar aýdaryldy.
Sonymen qatar kezdesýde halyqaralyq jáne óńirlik kún tártibindegi ózekti máseleler qarastyryldy.
