Prezident Qasym-Jomart Toqaev shetelden ókpeni jasandy jeldetý apparattary pen kerekti dári-dármekti ákelgen qoǵam belsendilerine qoldaý bildirdi. Apparatty shetelden satyp alǵanymen belsendiler ony elge kirgizý problemasy boiynsha Memleket basshysynan kómek suraǵan bolatyn, dep habarlaidy "Ult aqparat".
Jalpy elge osynaý qiyn kezeńde kómek kórsetýge belgili dintanýshy Qairat Joldybaiuly, aqyn Ainur Tursynbaeva, bloger ári jýrnalist Dáýlet Muqaev, Janat Baqyt, Dinara Sátjan qatarly belsendi azamattar jumylǵan bolatyn. Osy azamattar arnaiy shot ashyp, halyqtan jylý jinaǵan. Túrkiia men Qytaidan ókpeni jasandy jeldetý apparattary men dári-dármekti satyp alǵan olar osy kerek-jaraqty elge kirgizý máselesimen betpe-bet kelgen.
Ainur Tursynbaeva men Dáýlet Muqaev osy problemaǵa bailanysty Prezidentten kómek suraǵan. Olardyń aitýynsha bul kerek-jaraqtardy elge kirgizip, paidalaný úshin «SK-Farmatsiia» kompaniiasynyń ruqsaty kerek bolǵan. Memleket basshysy belsendi azamattardyń únine qulaq asyp, olarǵa kómek berilý kerektigin tapsyrǵan. Qasym-Jomart Toqaevtyń qoǵam belsendilerine kómek beretinin baspasóz hatshysy Berik Ýáli rastady. Osylaisha Ainur Tursynbaeva men Dáýlet Muqaev Túrkiiadan ókpeni jasandy jeldetýdiń 225 apparatyn óńir-óńirlerge taratpaq.
«Súiinshi! Qurmetti oqyrmandarym! Sanaýly saǵat ishinde bizdiń jan-aiqaiymyz Prezidentke jetip, másele oń sheshimin tapty. Halyqtan jinalǵan aqshaǵa alynǵan ottegi apparattaryn biz ózimiz taratatyn boldyq. Bizdiń áleýmettik jelige jariialaǵan postqa únsiz qalmai, birden máseleni sheshýge kómektesken barsha azamatqa alǵysymyzdy bildiremiz», - dep jazdy Dáýlet Muqaev keshe keshke Instagram paraqshasyna.
Belsendiler qarajat jinap, óńirlerge kerek-jaraqty taratý isin jalǵastyratyndar aityp jatyr.
