Foto: Aqorda
Memleket basshysy "Ana Tili" gazetine suhbat berip, halyqty tolǵandyrǵan suraqtarǵa jaýap berdi. Áńgime barysynda Qasym-Jomart Toqaev Talǵar oqiǵasyna qatysty pikir bildirdi. Ol elimizde «Zań men tártip» qaǵidaty myzǵymastai ornyǵýǵa tiis ekenin atap ótti.
"Men Talǵar oqiǵasyna deiin jariialaǵan Joldaýymda quqyq qorǵaý organdarynan qylmys pen qaraqshylyqtyń tamyryna balta shabýdy talap ettim. Qańtar oqiǵasy kezindegi jappai tártipsizdikti qylmystyq toptar jasaǵanyn esten shyǵarmaǵan jón. Memleket uiymdasqan qylmyspen ymyrasyz kúres júrgizýge shamasy jetetinin sońǵy eki jylda anyq kórsetti. Asa qaýipti qylmystyq toptar áshkerelenip, quryqtalyp jatyr. Olardyń sybailastary men qarjy kózderi de anyqtalyp otyr. Byltyr 246 adam qylmystyq jaýapkershilikke tartyldy. Onyń ishinde uiymdasqan qylmystyq toptardyń 30 basshysy bar. Bul jumysty men erekshe baqylaýda ustap otyrmyn", - dedi Toqaev.
Aitýynsha, Talǵardaǵy oqiǵadan keiin quqyq qorǵaý organdary qajetti sharalardyń bárin qabyldady. Kúdiktiler qamaýǵa alyndy. Tergep-tekserý jumystary aiaqtalýǵa jaqyn. Kóp uzamai osy iske qatysty sot bolady.
"Bul oqiǵaǵa orai quzyrly organdar qabyldaǵan barlyq shara zań talaptaryna tolyq sai keledi. Al basqanyń bári – qur daqpyrt pen teris piǵyldy keibir toptardyń osy jaǵdaiǵa saiasi sipat berýge degen umtylysy ǵana. Buǵan jol berýge bolmaidy", - dedi Memleket basshysy.
Osydan keiin Prezident tarihi Otanyna oralǵandar Qazaqstannyń zańdaryna qatań baǵynyp, qoǵamdyq tártipti saqtap, zańsyz áreketterden aýlaq bolýy kerek ekenin eskertti.
