فوتو: اقوردا
مەملەكەت باسشىسى "Ana Tili" گازەتٸنە سۇحبات بەرٸپ, حالىقتى تولعاندىرعان سۇراقتارعا جاۋاپ بەردٸ. ەڭگٸمە بارىسىندا قاسىم-جومارت توقاەۆ تالعار وقيعاسىنا قاتىستى پٸكٸر بٸلدٸردٸ. ول ەلٸمٸزدە «زاڭ مەن تەرتٸپ» قاعيداتى مىزعىماستاي ورنىعۋعا تيٸس ەكەنٸن اتاپ ٶتتٸ.
"مەن تالعار وقيعاسىنا دەيٸن جارييالاعان جولداۋىمدا قۇقىق قورعاۋ ورگاندارىنان قىلمىس پەن قاراقشىلىقتىڭ تامىرىنا بالتا شابۋدى تالاپ ەتتٸم. قاڭتار وقيعاسى كەزٸندەگٸ جاپپاي تەرتٸپسٸزدٸكتٸ قىلمىستىق توپتار جاساعانىن ەستەن شىعارماعان جٶن. مەملەكەت ۇيىمداسقان قىلمىسپەن ىمىراسىز كٷرەس جٷرگٸزۋگە شاماسى جەتەتٸنٸن سوڭعى ەكٸ جىلدا انىق كٶرسەتتٸ. اسا قاۋٸپتٸ قىلمىستىق توپتار ەشكەرەلەنٸپ, قۇرىقتالىپ جاتىر. ولاردىڭ سىبايلاستارى مەن قارجى كٶزدەرٸ دە انىقتالىپ وتىر. بىلتىر 246 ادام قىلمىستىق جاۋاپكەرشٸلٸككە تارتىلدى. ونىڭ ٸشٸندە ۇيىمداسقان قىلمىستىق توپتاردىڭ 30 باسشىسى بار. بۇل جۇمىستى مەن ەرەكشە باقىلاۋدا ۇستاپ وتىرمىن", - دەدٸ توقاەۆ.
ايتۋىنشا, تالعارداعى وقيعادان كەيٸن قۇقىق قورعاۋ ورگاندارى قاجەتتٸ شارالاردىڭ بەرٸن قابىلدادى. كٷدٸكتٸلەر قاماۋعا الىندى. تەرگەپ-تەكسەرۋ جۇمىستارى اياقتالۋعا جاقىن. كٶپ ۇزاماي وسى ٸسكە قاتىستى سوت بولادى.
"بۇل وقيعاعا وراي قۇزىرلى ورگاندار قابىلداعان بارلىق شارا زاڭ تالاپتارىنا تولىق ساي كەلەدٸ. ال باسقانىڭ بەرٸ – قۇر داقپىرت پەن تەرٸس پيعىلدى كەيبٸر توپتاردىڭ وسى جاعدايعا ساياسي سيپات بەرۋگە دەگەن ۇمتىلىسى عانا. بۇعان جول بەرۋگە بولمايدى", - دەدٸ مەملەكەت باسشىسى.
وسىدان كەيٸن پرەزيدەنت تاريحي وتانىنا ورالعاندار قازاقستاننىڭ زاڭدارىنا قاتاڭ باعىنىپ, قوعامدىق تەرتٸپتٸ ساقتاپ, زاڭسىز ەرەكەتتەردەن اۋلاق بولۋى كەرەك ەكەنٸن ەسكەرتتٸ.
