Memleket basshysy Shell kompaniiasynyń bas atqarýshy direktory Ben van Berdenmen jáne gaz, JEK, energetika salalaryndaǵy keshendi sheshimder bólimshesiniń direktory Ýael Saýanmen kezdesý ótkizdi, dep habarlaidy "Ult aqparat" Aqordanyń baspasóz qyzmetine silteme jasap.
Áńgimelesý barysynda munai-gaz jáne energetika sektorlaryndaǵy yntymaqtastyqtyń perspektivalary talqylandy. Qarashyǵanaq jáne Qashaǵan ken oryndaryn odan ári igerýge erekshe nazar aýdaryldy.
Qasym-Jomart Toqaev jaqyn arada qyzmetinen bosaityn Ben van Berdenge Qazaqstannyń munai-gaz salasyn damytýǵa qosqan úlesi úshin alǵys aitty. Sondai-aq atalǵan kompaniianyń basshylyǵyna keletin Ýael Saýanǵa tabys tiledi. Prezident onyń qyzmeti elimizben ózara tiimdi seriktestikti damytýǵa septigin tigizetinine senim bildirdi.
Kezdesý sońynda Memleket basshysy munai-gaz ónerkásibin damytýǵa qosqan eleýli úlesi úshin Ben van Berdendi II dárejeli «Dostyq» ordenimen marapattady.
