Memleket basshysy Qasym-Jomart Toqaev Sharyn shatqalyndaǵy qaiǵyly oqiǵa kezinde qaza tapqan Merei Ibragimovtiń jaqyndary men týystaryna kóńil aitty. Bul týraly QR Prezidentiniń baspasóz hatshysy Berik Ýáli Facebook paraqshasynda jazdy, dep habarlaidy "Ult aqparat".
Memleket basshysy 29 mamyr kúni Almaty oblysyndaǵy Sharyn shatqalynda bolǵan qaiǵyly oqiǵany úlken kúizelispen qabyl aldy. Qasym-Jomart Toqaev qaitys bolǵandardyń jaqyn týystaryna kóńil aityp, jaraqat alǵandardyń tezirek saýyǵyp ketýine tilektestik bildirdi.
«Shákirtterin qutqaramyn dep ózi qurban bolǵan bilikti maman Merei Nurǵazyuly ómirin ustazdyqqa arnady. Oqýshylarynyń súiikti muǵalimi boldy. Tabiǵat tosyn minez kórsetken apatty jaǵdaida jas ustaz batyldyq tanytyp, oqýshysyna jankeshtilikpen kómek kórsetýge umtyldy. 26 jasynda ómirden qyrshyn ketken Merei Nurǵazyulynyń erligi men jarqyn beinesi umytylmaidy», – delingen kóńil aitý jedelhatynda.
Memleket basshysynyń Jarlyǵymen adam ómirin saqtap qalýǵa bailanysty qiyn-qystaý jaǵdaida kórsetken erjúrektigi men janqiiarlyǵy úshin marqum Merei Ibragimov «Erligi úshin» medalimen nagradtaldy.
