مەملەكەت باسشىسى قاسىم-جومارت توقاەۆ شارىن شاتقالىنداعى قايعىلى وقيعا كەزٸندە قازا تاپقان مەرەي يبراگيموۆتٸڭ جاقىندارى مەن تۋىستارىنا كٶڭٸل ايتتى. بۇل تۋرالى قر پرەزيدەنتٸنٸڭ باسپاسٶز حاتشىسى بەرٸك ۋەلي Facebook پاراقشاسىندا جازدى, دەپ حابارلايدى "ۇلت اقپارات".
مەملەكەت باسشىسى 29 مامىر كٷنٸ الماتى وبلىسىنداعى شارىن شاتقالىندا بولعان قايعىلى وقيعانى ٷلكەن كٷيزەلٸسپەن قابىل الدى. قاسىم-جومارت توقاەۆ قايتىس بولعانداردىڭ جاقىن تۋىستارىنا كٶڭٸل ايتىپ, جاراقات العانداردىڭ تەزٸرەك ساۋىعىپ كەتۋٸنە تٸلەكتەستٸك بٸلدٸردٸ.
«شەكٸرتتەرٸن قۇتقارامىن دەپ ٶزٸ قۇربان بولعان بٸلٸكتٸ مامان مەرەي نۇرعازىۇلى ٶمٸرٸن ۇستازدىققا ارنادى. وقۋشىلارىنىڭ سٷيٸكتٸ مۇعالٸمٸ بولدى. تابيعات توسىن مٸنەز كٶرسەتكەن اپاتتى جاعدايدا جاس ۇستاز باتىلدىق تانىتىپ, وقۋشىسىنا جانكەشتٸلٸكپەن كٶمەك كٶرسەتۋگە ۇمتىلدى. 26 جاسىندا ٶمٸردەن قىرشىن كەتكەن مەرەي نۇرعازىۇلىنىڭ ەرلٸگٸ مەن جارقىن بەينەسٸ ۇمىتىلمايدى», – دەلٸنگەن كٶڭٸل ايتۋ جەدەلحاتىندا.
مەملەكەت باسشىسىنىڭ جارلىعىمەن ادام ٶمٸرٸن ساقتاپ قالۋعا بايلانىستى قيىن-قىستاۋ جاعدايدا كٶرسەتكەن ەرجٷرەكتٸگٸ مەن جانقييارلىعى ٷشٸن مارقۇم مەرەي يبراگيموۆ «ەرلٸگٸ ٷشٸن» مەدالٸمەن ناگرادتالدى.
