Foto: Akorda.kz
Prezident Rýdnyi qalasynyń turǵyndarymen kezdesti, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy Qostanai oblysyna jumys sapary barysynda, eń aldymen, Rýdnyi qalasyndaǵy jylý qubyrynyń jarylý saldarymen tanysyp, qalpyna keltirý jumystarynyń barysy týraly óńir basshylyǵynyń baiandamasyn tyńdady.
Qala ákimi Qýandyq Ispergenovtiń aitýynsha, qazirgi ýaqytta qubyrlar ishinara qalpyna keltirilgen. Sondai-aq topyraq tóseý jumystary júrgizilip jatyr. Ákim jaqyn arada qalpyna keltirý jumystary tolyq aiaqtalatynyn málimdedi.
– Jalpy, elimiz boiynsha da, osy oblysta da jylý qubyrlary apatty jaǵdaida tur. Jaǵdai óte aýyr. Úkimetke búginnen bastap, ásirese kóktem jáne jaz ailarynda qysqy jylytý maýsymyna muqiiat daiyndalýdy tapsyramyn. Bul – atqaratyn basty mindet, sebebi muny sozbalańǵa salýǵa bolmaidy. Jelilerdiń tozý deńgeii óte joǵary, 70, 80, keibir jerlerde tipti 90 paiyzǵa deiin jetedi. Osy jumystarmen ainalysý qajet, – dedi Prezident.
Memleket basshysy jylý qubyrynyń jarylýy saldarynan zardap shekken Rýdnyi turǵyndarymen kezdesý barysynda azamattardyń ómirine bulai qaýip tóndirýge bolmaitynyn aitty. Prezident Qostanai oblysy men qala basshylyǵyna jaǵdaidy jedel qalpyna keltirýdi tapsyrdy.
– Qubyrdyń jarylǵany týraly habardy tekserý úshin arnaiy keldim. Jańa ǵana Úkimetke, oblys pen qala ákimderine osy máselemen ainalysýdy tapsyrdym, – dedi Qasym-Jomart Toqaev.
Sonymen qatar Memleket basshysy Úkimetke Rýdnyidyń áleýmettik-ekonomikalyq damý máselelerine erekshe nazar aýdarýdy tapsyrǵanyn atap ótti.
Qasym-Jomart Toqaev turǵyn úilerge jylýdyń qaita berilgenin óz kózimen kórý úshin Rýdnyi turǵyndarynyń biriniń shaqyrýymen onyń páterine bardy. Qala turǵyny Olesia Geria jylý berý jumysyn jedel atqarǵany úshin barlyq qyzmetkerge alǵysyn aitty.
Prezident Qasym-Jomart Toqaev Úkimetke jáne Qostanai oblysynyń ákimi Qumar Aqsaqalovqa barlyq kommýnaldyq nysannyń úzdiksiz jumysyn qamtamasyz etý isin erekshe baqylaýǵa alýdy tapsyrdy.
