Ulttyq merekeler men ataýly kúnder tizbesine birqatar ózgeris engizgen jón. Bul týraly QR Prezidenti Qasym-Jomart Toqaev Ulttyq quryltaida aitty, dep habarlaidy "Ult aqparat" Aqordanyń baspasóz qyzmetine silteme jasap.
«Eldiń tarihi jadyn jańǵyrtý úshin úilesimdi saiasattyń bolýy erekshe mańyzdy. Osy oraida, biz el damýynyń jańa basymdyqtaryn belgilep alýymyz kerek. Ulttyq merekeler men ataýly kúnder tizbesine birqatar ózgeris engizgen jón.
Men Respýblika kúnine ulttyq mereke mártebesin qaitarýdy usynamyn. Sondyqtan qazannyń jiyrma besi kúni jyl saiyn Egemendik kúnin elimizdiń basty merekesi retinde atap ótýimiz kerek.
1990 jyly 25 qazanda Qazaqstannyń egemendigi týraly deklaratsiia qabyldandy. Bul elimizdiń táýelsizdik jolyndaǵy tuńǵysh qadamy bolatyn. Osy qujatty qabyldaǵan kezde Tuńǵysh Prezident Nursultan Nazarbaev asa mańyzdy, tipti sheshýshi ról atqardy.
Respýblika kúni eldiń memleket qurý jolyndaǵy tarihi qadamynyń simvoly bolýy kerek. Árine, Táýelsizdik kúniniń bastapqy máni saqtalady. Bul kún memlekettik mereke bolyp qala beredi. Biraq, táýelsizdik alýǵa zor úles qosqan ulttyq batyrlarymyzǵa taǵzym kúni retinde atap ótilýi kerek» - dedi Memleket basshysy.
Aita keteiik, Prezident Ulytaý oblysyndaǵy jumys sapary aiasynda Ulttyq quryltaidyń alǵashqy otyrysyna qatysyp jatyr.
