Qasym-Jomart Toqaev Qazaqstannyń Olimpiada jáne Paralimpiada ulttyq quramalarynyń múshelerimen kezdesti, dep habarlaidy "Ult aqparat" Aqordaǵa silteme jasap.
Memleket basshysy jýyrda Beijiń qalasynda ótetin HHIV qysqy Olimpiada jáne Paralimpiada oiyndarynyń barsha sportsúier qaýym úshin aitýly oqiǵa ekenine toqtalyp, Qazaqstan osy saiysqa eń úzdik sportshylaryn attandyratynyn atap ótti.
– Dúbirli dodada el namysyn qorǵaý – mártebeli mindet ári zor jaýapkershilik. Bizdiń sportshylarymyz Olimpiada oiyndarynda talai ret jeńis tuǵyryna kóterildi. Kók týymyzdy jelbiretip, ánuranymyzdy áýeletti. Sondai sátte árbir azamatymyzdyń keýdesin maqtanysh sezimi kerneitini sózsiz. Sizder aldaǵy saiysta halqymyzdyń senimin aqtaisyzdar dep senemin, – dep jigerlendirdi Prezident.
Memleket basshysy buǵan deiin Qazaqstan atletteriniń qysqy Olimpiada jáne Paralimpiada oiyndarynda jalpy 2 altyn, 4 kúmis jáne 4 qola medal oljalaǵanyn atap ótip, Olimpiada tarihynda esimderi altyn árippen jazylǵan Vladimir Smirnov, Liýdmila Prokasheva, Elena Hrýstaleva, Denis Ten jáne Iýliia Galysheva syndy sportshylardyń dańqty jeńisteri azamattarymyzdyń patriottyq sezimin arttyrǵanyn aitty.
– Aldaǵy Olimpiadada sizder de laiyqty óner kórsetetinderińizge senimdimin. Paralimpiadashylar úshin de mańyzdy sát jaqyndady. Elimizde inkliýzivti qoǵamdy damytý jolynda Paralimpiada oiyndarynyń mańyzy zor. Qazaqstandyq paralimpiadashylardyń jeńisteri – maqsatqa umtylýdyń, tabandylyq pen óz kúshine degen senimniń úlgisi. Ókinishke qarai, bizdiń sportshylardyń sońǵy daiyndyq kúnderi qańtardaǵy qaiǵyly oqiǵalarmen tuspa-tus keldi. Eń bastysy, yntymaq pen birliktiń arqasynda bizdiń halqymyz memlekettiń tutastyǵyna nuqsan keltiretin lańkestikke laiyqty toitarys bere aldy. Biz búkil el bolyp ulttyq quramaǵa jankúier bolatyn jarys kúnderi de jalpyulttyq birligimizdi kórsetetinimizdi bilemin, – dedi Memleket basshysy.
Prezident sportshylardyń Olimpiada joldamasy jolynda jankeshtilikpen eńbektengenine toqtalyp, olardyń kásibi turǵydan jetile túsýine bar kúshin salǵan bapkerlerdiń de eńbegin atap ótti.
– Endi týystaryńyz ben jaqyndaryńyzdyń ǵana emes, milliondaǵan qazaqstandyq jankúierdiń úmitin aqtaý kerek. Sizderdiń jeńiske degen jigerlerińiz – óskeleń urpaqqa úlgi, – dedi Qasym-Jomart Toqaev.
Memleket basshysy buqaralyq jáne balalar men jasóspirimder sporty árdaiym elimizdiń basym baǵyty ekenin aitty. Byltyrdan bastap óziniń tapsyrmasyna sáikes sport salasyndaǵy memlekettik tapsyrystar boiynsha jan basyna qarjy bólý iske qosylǵanyna toqtaldy.
– Bul sheshim sport sektsiialary men aýla klýbtarynyń damýyna tyń serpin berdi. Ózderińiz bilesizder, 2022 jyldy Balalar jyly dep jariialadym. Óskeleń urpaqtyń úilesimdi damýyn qamtamasyz etý úshin memleket pen qoǵam kúsh biriktirýi qajet. Qolǵa alynǵan osy is-áreketter balalarymyzdyń densaýlyǵyn nyǵaitýǵa, olardy rýhani, adamgershilik turǵysynan tárbieleýge septigin tigizerine senimdimin, – dedi Prezident.
Kezdesý sońynda Olimpiada quramasynyń kapitany Abzal Ájiǵaliev pen Paralimpiada quramasynyń kapitany Aleksandr Gerlits Prezidenttiń qolynan Memlekettik tý alyp, ant berdi.
Qasym-Jomart Toqaev sportshylarymyzdyń kók týymyzdy Olimp shyńyna shyǵaryp, memleketimizdiń mereiin kótere berýine tilektestik bildirdi.
