Ulttyq ekonomika ministri Álibek Qýantyrov Prezident ókilettikterin shamadan tys shoǵyrlandyrýdan bas tartý maqsatynda zańnamaǵa qandai túzetýler engiziletinin aitty, dep habarlaidy QazAqparat.
«Memleket basshysynyń 2022 jylǵy 16 naýryzdaǵy «Jańa Qazaqstan: jańarý men jańǵyrý joly» atty Qazaqstan halqyna Joldaýyn iske asyrý jónindegi jalpyulttyq is-sharalar josparynyń jobasy engizilip otyr. Jalpyulttyq is-sharalar josparynyń jobasy 10 baǵyt boiynsha 36 is-sharany qamtidy. Olar eldiń saiasi júiesi men ákimshilik-aýmaqtyq qurylymyn ózgertýge, daǵdarysqa qarsy birinshi kezektegi sharalardy qabyldaýǵa baǵyttalǵan», - dedi ol búgin Úkimet otyrysynda.
Onyń atap ótýinshe, «Prezidenttiń ókilettikteri týraly» birinshi baǵyt boiynsha 3 is-sharany iske asyrý kózdelgen.
«Prezident ókilettikterin shamadan tys shoǵyrlandyrýdan bas tartý maqsatynda zańnamaǵa mynadai túzetýler engiziledi. Olar:
- Prezidenttiń óz ókilettikterin atqarýy kezinde saiasi partiiaǵa músheligin toqtatýyn;
- Prezidenttiń jaqyn týystarynyń memlekettik saiasi qyzmetshiler men kvazimemlekettik sektor kásiporyndarynyń basshylary laýazymdaryn atqarýyna tyiym salýdy;
- Prezidenttiń oblys, respýblikalyq mańyzy bar qala jáne astana ákimderi aktileriniń kúshin joiý nemese olardy toqtata turý jónindegi quzyretin alyp tastaýdy;
- aýdan, oblystyq mańyzy bar qala, aýdandyq mańyzy bar qala, aýyl, kent, aýyldyq okrýg ákimderin laýazymynan bosatý quqyǵyn joiýdy kózdeitin bolady», - dedi ministr.
Sonymen qatar Álibek Qýantyrovtyń aitýynsha, partiialyq qurylymdardyń memlekettik apparatpen birigýine jol bermeý úshin zańnamaǵa Ortalyq sailaý komissiiasynyń, Esep komitetiniń, Konstitýtsiialyq keńestiń tóraǵalary men músheleriniń partiiadan mindetti túrde shyǵýy týraly erejeler engiziledi. Ákimder men olardyń orynbasarlaryna saiasi partiialardyń filialdarynda qyzmet atqarýǵa tyiym salynady.
