ۇلتتىق ەكونوميكا مينيسترٸ ەلٸبەك قۋانتىروۆ پرەزيدەنت ٶكٸلەتتٸكتەرٸن شامادان تىس شوعىرلاندىرۋدان باس تارتۋ ماقساتىندا زاڭناماعا قانداي تٷزەتۋلەر ەنگٸزٸلەتٸنٸن ايتتى, دەپ حابارلايدى قازاقپارات.
«مەملەكەت باسشىسىنىڭ 2022 جىلعى 16 ناۋرىزداعى «جاڭا قازاقستان: جاڭارۋ مەن جاڭعىرۋ جولى» اتتى قازاقستان حالقىنا جولداۋىن ٸسكە اسىرۋ جٶنٸندەگٸ جالپىۇلتتىق ٸس-شارالار جوسپارىنىڭ جوباسى ەنگٸزٸلٸپ وتىر. جالپىۇلتتىق ٸس-شارالار جوسپارىنىڭ جوباسى 10 باعىت بويىنشا 36 ٸس-شارانى قامتيدى. ولار ەلدٸڭ ساياسي جٷيەسٸ مەن ەكٸمشٸلٸك-اۋماقتىق قۇرىلىمىن ٶزگەرتۋگە, داعدارىسقا قارسى بٸرٸنشٸ كەزەكتەگٸ شارالاردى قابىلداۋعا باعىتتالعان», - دەدٸ ول بٷگٸن ٷكٸمەت وتىرىسىندا.
ونىڭ اتاپ ٶتۋٸنشە, «پرەزيدەنتتٸڭ ٶكٸلەتتٸكتەرٸ تۋرالى» بٸرٸنشٸ باعىت بويىنشا 3 ٸس-شارانى ٸسكە اسىرۋ كٶزدەلگەن.
«پرەزيدەنت ٶكٸلەتتٸكتەرٸن شامادان تىس شوعىرلاندىرۋدان باس تارتۋ ماقساتىندا زاڭناماعا مىناداي تٷزەتۋلەر ەنگٸزٸلەدٸ. ولار:
- پرەزيدەنتتٸڭ ٶز ٶكٸلەتتٸكتەرٸن اتقارۋى كەزٸندە ساياسي پارتيياعا مٷشەلٸگٸن توقتاتۋىن;
- پرەزيدەنتتٸڭ جاقىن تۋىستارىنىڭ مەملەكەتتٸك ساياسي قىزمەتشٸلەر مەن كۆازيمەملەكەتتٸك سەكتور كەسٸپورىندارىنىڭ باسشىلارى لاۋازىمدارىن اتقارۋىنا تىيىم سالۋدى;
- پرەزيدەنتتٸڭ وبلىس, رەسپۋبليكالىق ماڭىزى بار قالا جەنە استانا ەكٸمدەرٸ اكتٸلەرٸنٸڭ كٷشٸن جويۋ نەمەسە ولاردى توقتاتا تۇرۋ جٶنٸندەگٸ قۇزىرەتٸن الىپ تاستاۋدى;
- اۋدان, وبلىستىق ماڭىزى بار قالا, اۋداندىق ماڭىزى بار قالا, اۋىل, كەنت, اۋىلدىق وكرۋگ ەكٸمدەرٸن لاۋازىمىنان بوساتۋ قۇقىعىن جويۋدى كٶزدەيتٸن بولادى», - دەدٸ مينيستر.
سونىمەن قاتار ەلٸبەك قۋانتىروۆتىڭ ايتۋىنشا, پارتييالىق قۇرىلىمداردىڭ مەملەكەتتٸك اپپاراتپەن بٸرٸگۋٸنە جول بەرمەۋ ٷشٸن زاڭناماعا ورتالىق سايلاۋ كوميسسيياسىنىڭ, ەسەپ كوميتەتٸنٸڭ, كونستيتۋتسييالىق كەڭەستٸڭ تٶراعالارى مەن مٷشەلەرٸنٸڭ پارتييادان مٸندەتتٸ تٷردە شىعۋى تۋرالى ەرەجەلەر ەنگٸزٸلەدٸ. ەكٸمدەر مەن ولاردىڭ ورىنباسارلارىنا ساياسي پارتييالاردىڭ فيليالدارىندا قىزمەت اتقارۋعا تىيىم سالىنادى.
