QR Prezidenti Qasym-Jomart Toqaev Ádilet ministri Marat Beketaevty qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Qasym-Jomart Toqaevqa ministrliktiń biylǵy 9 ai ishinde atqarǵan jumystarynyń nátijeleri jóninde esep berildi.
Ádilet ministri Memleket basshysyna koronavirýs pandemiiasymen kúres jumystarynyń júrgizilýi, sonyń ishinde, birqatar zań jobalarynyń ázirlený barysy, olardyń quqyqtyq saraptamasy men Parlamentte qaralýy týraly baiandady.
Marat Beketaev Prezidentke biylǵy naýryz-mamyr ailarynda engizilgen tótenshe jaǵdai rejimine bailanysty quqyqtyq máselelerdi túsindirý jumystary jaiynda aitty. Osy rette, advokattar men zań jóninde keńes berýshilerdiń úzdiksiz qyzmeti qamtamasyz etilgen, sot oryndaýshylarynyń jumysy ýaqytsha toqtatylǵan. Tótenshe jaǵdai rejimi aiaqtalǵannan keiin barlyq sot oryndaýshylarynyń jumysy azamattardyń quqyǵyn qorǵaýǵa, atap aitqanda, alimentterdi óndirýge jáne eńbekaqy tólemin qamtamasyz etýge baǵyttaldy.
Sonymen qatar Qasym-Jomart Toqaevqa sot saraptamasy organdarynyń jumysyn jetildirý jóninde málimet berildi.
Kezdesý sońynda Memleket basshysy ministrge azamattardyń quqyqtaryn qorǵaýǵa, normativtik aktilerdi shyǵarý qyzmetiniń sapasyn arttyrýǵa, jańa zańdardy jáne basqa da normativtik-quqyqtyq aktilerdi daiyndaý jónindegi memlekettik organdardyń jumysyn úilestirýge qatysty birqatar tapsyrma berdi.
