Qazaqstan Prezidentiniń Túrkistan oblysyna sapary Sardoba sý qoimasyndaǵy apattan zardap shekken turǵyndar úshin Myrzakent aýylynda salynyp jatqan jańa yqshamaýdannyń qurylysymen tanysýdan bastaldy.
Bul týraly "Ult aqparat" Aqordanyń resmi saityna silteme jasap habarlaidy.
Apat saldarynan 4 myńǵa jýyq halyq zardap shegip, 500-den astam baspana tolyǵymen buzylyp, qaita salyndy. Jeńis, Jańaturmys, Dostyq eldimekenderiniń turǵyndary úshin Myrzakent aýylynda jańa yqshamaýdan boi kóterdi, árbir otbasy múshesine 100 myń teńgeden berildi. Órgebas, Firdaýsi aýyldaryn qaita qalpyna keltirý jumystarynyń qarqyny jaqsy. Aita keterligi, atalǵan aýyldardaǵy apattan baspanalary búlinip-qiraǵan turǵyndarǵa 17 million teńgeden berilip jatyr.
Qurylys barysymen tanysqan Qasym-Jomart Toqaev turǵyndarmen kezdesti. Prezident sý tasqyny kezinde memleket shuǵyl sheshim qabyldap, aýdandy qalpyna keltirý úshin qazynadan qarjy bólingenin, osyndai syn sátte búkil halqymyzdyń uiymshyldyq tanytqanyn atap ótti.
– Jańa shaǵyn aýdan salynyp jatyr. Zardap shekken birde-bir adam dalada qalǵan joq. Árbir turǵynnyń jaǵdaiyn eskerdik. Jańa baspanaǵa kóshem degen adamdar osynda qonys aýdarady. Kóp uzamai barlyǵy óz úilerine oralatyn bolady. Aýqymdy jumys atqarylyp jatyr. «Jumyla kótergen júk jeńil» degen. Kásipkerler, qurylysshylar, dárigerler, qarapaiym azamattar, kóptegen eriktiler belsendi jumys istedi. Barlyǵyna shynaiy rizashylyǵymdy bildiremin, – dedi Memleket basshysy.
Qazaqstan Prezidenti aýdandaǵy ahýaldy tikelei ózi qadaǵalap otyrǵanyn jetkizdi.
Sapar barysynda Ekologiia, geologiia jáne tabiǵi resýrstar ministri Maǵzum Myrzaǵaliev Ózbekstan Respýblikasymen birlesip sý tasqynynyń saldaryn joiý, aldaǵy ýaqytta mundai apatty boldyrmaýǵa qatysty qabyldanyp jatqan sharalar jaiynda baiandady.
Qasym-Jomart Toqaev jumysty nátijeli jalǵastyra berý kerek dep tapsyrdy.
