Memleket basshysy Qasym-Jomart Toqaev Astanadaǵy «Atameken» etno-memorialdyq kesheninde ótken Memlekettik tý kóterý rásimine qatysty, dep habarlaidy ult.kz.
Saltanatty shara barysynda Qazaqstannyń Ánurany shyrqalyp, kók bairaq kóterildi. Prezident Memlekettik rámizder kúni árbir qazaqstandyq úshin erekshe mańyzǵa ie ekenin atap ótti.
– Kók týymyz – Táýelsizdiktiń tumary. Eltańba – eldigimizdiń belgisi, Ánuran – halqymyzdyń aibyndy úni. Bul úsh rámiz – memlekettigimizdiń myzǵymas tuǵyry, – dedi Qasym-Jomart Toqaev.
Prezident ulttyq rámizderdi qurmetteý otanshyldyqtyń basty kórinisi ekenin aityp, olardyń mártebesin arttyrý baǵytyndaǵy jumystar jalǵasatynyn jetkizdi. Onyń sózinshe, Úkimet jaqyn ýaqytta memlekettik rámizderdi paidalaný tártibine qatysty qaýlyǵa ózgerister engizedi.
Memleket basshysy sondai-aq jańa Konstitýtsiia ádiletti Qazaqstan qurý jolyndaǵy berik negizge ainalǵanyn atap ótti.
Aita keteiik, 4 maýsym – Qazaqstandaǵy Memlekettik rámizder kúni. Biyl táýelsiz Qazaqstannyń Týy, Eltańbasy men Ánuranynyń qabyldanǵanyna 34 jyl toldy. Qazaqstannyń kók bairaǵy Reddit platformasyndaǵy halyqaralyq onlain-týrnirde álemdegi eń úzdik memlekettik tý dep tanylǵan. Sonymen qatar memlekettik rámizderdiń kóshirmeleri Arktikalyq dúniejúzilik arhivte saqtaýly.
