Qazaqstan Prezidenti Elorda kúnine arnalǵan merekelik is-sharany dástúrli túrde ashatyn Memlekettik tý kóterý saltanatty rásimine qatysty, dep habarlaidy "Ult aqparat" Aqordaǵa silteme jasap.
– Biyl qasterli Táýelsizdigimizge – 30 jyl. Sondyqtan bul rásimniń tarihi mán-mańyzy airyqsha. Kók týymyz – Táýelsiz Qazaqstannyń eń basty rámizi. Halqymyz úshin azattyqtan asyl, bairaqtan biik qundylyq joq. Qazaqtyń tarihy «Týyń jyǵylmasyn!» degen bir aýyz tilekke syiyp tur. Babalarymyz qashanda týyn biik ustaǵan. Eldigi synǵa túsken sátte bairaq astyna birigip, tutastyǵyn tanytqan. Erlik pen birliktiń dástúri urpaqtan urpaqqa jalǵasyp, Táýelsizdik dáýirine ulasty. Egemen eldiń kók bairaǵy – myzǵymas memlekettigimizdiń belgisi, – dedi Prezident.
Qasym-Jomart Toqaev joǵary áskeri oqý ornynyń túlekteriniń aldynda sóilegen sózinde Memlekettik týymyz ben elimizdiń bas qalasy ult birliginiń jarqyn simvoly ekenin aitty.
– Elordamyz – qazirgi Qazaqstannyń betke ustar bas qalasy. Elimizdiń ortalyq megapolisi bolashaqqa jol ashatyn ordaǵa, jalpy ult bolyp uiysýdyń jáne shynai patriotizmniń úlgisine ainaldy. Tuńǵysh Prezident – Elbasy men milliondaǵan otandasymyzdyń qajyrly eńbeginiń arqasynda boi kótergen qala – halqymyzdyń maqtanyshy. Otanymyzdyń júregi dál osy jerde soǵyp tur. Asa mańyzdy sheshimderdiń bári osy jerde qabyldanyp, salmaqty oi-pikirler ortaǵa salynyp, biregei jobalar júzege asyrylyp jatyr, – dedi Memleket basshysy.
Qazaqstan Prezidentiniń pikirinshe, elorda daryndy, jigerli otandastarymyzdyń, sondai-aq, ózge memleketterdiń kóptegen azamattarynyń bas qosatyn ortalyǵyna ainaldy. Qasym-Jomart Toqaev Uly dala kindiginde qasietti Týdy biikte jelbirete otyryp, erkindik pen egemendik muratyna beiildi ekenimizdi atap ótti.
– Elorda kúni adamdardy qoldap, shabyttandyrý, birliktiń kúshin, ózara kómektiń mańyzdylyǵy men ár azamattyń ortaq iske qosqan úlesiniń qundylyǵyn dáripteý úshin asa mańyzdy. Elorda turǵyndary ekpe salý naýqany men shekteý sharalaryn saqtaý kezinde aldyńǵy qatarda bolýy qajet. Jappai vaktsinalaý qalypty tynys-tirshilikke qaita oralýdyń, adamdardyń densaýlyǵyn saqtaýdyń jalǵyz joly ekenin durys túsinýimiz kerek. «Biz birgemiz» urany asa qaterli indetke qarsy kúrestegi jeńisimizdiń boitumary bolatynyna senimdimin, – dedi Qasym-Jomart Toqaev.
Rásim barysynda joǵary áskeri oqý ornynyń 12 úzdik túlegi Qazaqstan Prezidenti – Qazaqstan Respýblikasynyń Joǵarǵy Bas qolbasshysynyń qolynan ofitser pogonyn aldy.
– Oqýlaryńyzdyń sátti aiaqtalǵany qutty bolsyn, jas ofitserler! Ofitserlik shen – bul, eń birinshi, Otan aldyndaǵy zor jaýapkershilik. Bolashaqta komandir atanyp, jas sarbazdarǵa tálim beresizder. Sondyqtan otanshyl, batyl jáne aibyndy bolyp, úlgi kórsetý asa mańyzdy. Múltiksiz qyzmet etý – bárińizge ortaq mindet. Antqa adal bolý, Táýelsiz elimizdi qorǵaý – qasterli paryz, – dedi Memleket basshysy.
Jiyn sońynda Qasym-Jomart Toqaev barlyq qatysýshylardy kele jatqan Elorda kúnimen quttyqtap, Otanymyzdyń ósip-órkendei berýine tilektestik bildirdi.
